కరోనా వైరస్ పేరు వింటేనే ప్రపంచ దేశాలు వణికిపోతుంటే.. తమకు పుట్టిన కవలలకు ఆ పేర్లే పెట్టింది ఛత్తీస్గఢ్ రాయ్పుర్కు చెందిన ఓ జంట. బాబుకు కొవిడ్, పాపకు కరోనా అని నామకరణం చేసింది.
అడ్డంకుల్ని అధిగమించి...
ఉత్తర్ప్రదేశ్కు చెందిన 27 ఏళ్ల ప్రీతి వర్మ.... భర్తతో కలిసి రాయ్పుర్లో అద్దెకు ఉంటోంది. మార్చి 26 అర్ధరాత్రి తర్వాత పురిటి నొప్పులు ఆమెను వేధించాయి. లాక్డౌన్ పరిస్థితుల మధ్య ఎన్నో ఇబ్బందుల అనంతరం.. డాక్టర్ బీఆర్ అంబేడ్కర్ మెమోరియల్ ఆస్పత్రికి చేరుకున్నారు ఆ దంపతులు. ప్రీతికి సిజేరియన్ ఆపరేషన్ చేశారు. మార్చి 27 తెల్లవారుజామున పండంటి కవలలకు జన్మనిచ్చింది.
''పురిటి నొప్పులు, లాక్డౌన్, పోలీసులు ఆపడం, తట్టుకోలేని నొప్పి, సిజేరియన్ ఆపరేషన్, లాక్డౌన్ వల్ల బంధువులు ఆస్పత్రికి రాలేకపోవడం.. వీటన్నింటి మధ్య ఒక ఆనందం.. మాకు కవలలు పుట్టారు. ఈ కరోనా సమయాన్ని మేం ఎప్పటికీ మర్చిపోలేం. అందుకే మా పిల్లలకు జీవితాంతం గుర్తుండేలా ఈ పేర్లు పెట్టాలనుకుంటున్నాం.''
-ప్రీతి వర్మ, కవలల తల్లి
కరోనా, కొవిడ్ పేర్లు పెట్టిన అనంతరం ఆ నవజాత శిశువులు ఆస్పత్రిలో ప్రత్యేక ఆకర్షణగా నిలిచారు. తమ పిల్లలను కరోనా పేర్లతో పిలుస్తుంటే సంతోషపడుతున్నారు ఆ దంపతులు. అయితే... తర్వాత మనసు మారితే పిల్లల పేర్లూ మార్చే అవకాశముందని అంటున్నారు.
ఇటీవల ఉత్తర్ప్రదేశ్లోనూ రెండు కుటుంబాలు తమకు పుట్టిన పిల్లలకు కరోనా, లాక్డౌన్అని పేర్లు పెట్టుకున్నాయి.
