పాంగాంగ్ సరస్సు సహా కీలక ఘర్షణ ప్రాంతాల నుంచి సత్వరమే బలగాలను ఉపసంహరించుకునేలా చైనా కృషి చేయాలని సూచించింది భారత్. తూర్పు లద్దాఖ్లో నెలకొన్న ఉద్రిక్త పరిస్థితులను తగ్గించేందుకు చర్యలు చేపట్టాలని పేర్కొంది.
వాస్తవాధీన రేఖ(ఎల్ఏసీ)ని చైనా గౌరవిస్తుందనే నమ్మకం ఉందన్నారు విదేశాంగ శాఖ అధికార ప్రతినిధి అనురాగ్ శ్రీవాస్తవ. ఈ సందర్భంగా రష్యా వేదికగా ఇరు దేశాల విదేశాంగ, రక్షణ మంత్రుల భేటీల్లో కుదిరిన ఏకాభిప్రాయాన్ని ప్రస్తావించారు.
" ఇరుదేశాల మంత్రుల సమావేశాల్లో ఏకాభిప్రాయం కుదిరింది. ఎల్ఏసీ వెంబడి ఘర్షణ ప్రాంతాల నుంచి సత్వరమే పూర్తిస్థాయిలో బలగాల ఉపసంహరణ చేపట్టాలి. పరిస్థితుల్లో తీవ్రతను పెంచే విధంగా ఎలాంటి చర్యలకు పోకుండా.. ఘర్షణ ప్రాంతాల్లో ఉద్రిక్తతలను తగ్గించేందుకే ఇరువైలా దృష్టిసారించాలి. ఇందుకు ద్వైపాక్షిక ఒప్పందాలు, ప్రోటోకాల్ను కచ్చితంగా పాటించటం అవసరం. యథాతథ స్థితిని మార్చేందుకు ఎలాంటి ఏకపక్ష చర్యలు తీసుకోకూడదు. "
- అనురాగ్ శ్రీవాస్తవ, విదేశాంగ శాఖ అధికార ప్రతినిధి
ఇదీ చూడండి: కొద్ది గంటల్లోనే వ్యూహం మార్చిన చైనా- ఎందుకు?
