కరోనా మహమ్మారి వ్యాప్తిని అరికట్టేందుకు విధించిన లాక్డౌన్.. నిండు గర్భిణికీ ఇక్కట్లు తెచ్చిపెట్టింది. పురిటి నొప్పులతో ఆసుపత్రికి వెళ్తుంటే పోలీసులు అడ్డుకునేసరికి.. అంబులెన్స్లోనే బిడ్డకు జన్మనిచ్చింది బిహార్కు చెందిన గౌరీ దేవి.
అనుమతించని పోలీసులు
25 ఏళ్ల గౌరి, ఆమె భర్త... పొట్టకూటి కోసం బిహార్ నుంచి కేరళ కాసర్గోడ్ జిల్లాకు వలసొచ్చారు. ఓ ప్లైవుడ్ పరిశ్రమలో ఉపాధి పొందారు. నెలలు నిండిన గౌరికి పురిటి నొప్పులు మొదలయ్యాయి. అంబులెన్స్లో తాను ఎప్పుడూ పరీక్షలు చేయించుకునే కర్ణాటక మంగళూరు ఆసుపత్రికి బయల్దేరింది. తాళపాడిలో సరిహద్దు వద్ద అంబులెన్స్ను అడ్డుకున్నారు కర్ణాటక పోలీసులు.
ఓ వైపు నిండు గర్భిణీ పురిటి నొప్పులతో బాధపడుతున్నా.. లాక్డౌన్ నిబంధనలను ఉల్లంఘించేది లేదన్నారు పోలీసులు. కరోనా వ్యాప్తిని అరికట్టేందుకు సహకరించాలన్నారు. గత్యంతరం లేక దగ్గర్లోని మరో ఆసుపత్రికి తరలించే ప్రయత్నం చేశారు అంబులెన్స్ సిబ్బంది. కానీ, అప్పటికే పురిటి నొప్పులు ఎక్కువై వాహనంలోనే పండంటి ఆడబిడ్డను ప్రసవించింది గౌరీ.
ఆ తర్వాత బిడ్డతో సహా ప్రభుత్వాసుపత్రికి చేరింది గౌరి. వైద్యులు పరీక్షించి తల్లి, బిడ్డా క్షేమంగా ఉన్నారని తెలిపారు. లాక్డౌన్ కారణంగా గర్భిణీలు మాత్రమే కాక... డయాలసిస్ బాధితులు, హృద్రోగులు, క్యాన్సర్ చికిత్స పొందుతున్నవారూ అత్యవసర సమయాల్లో ఇబ్బందులు ఎదుర్కొంటున్నారని వాపోయారు స్థానికులు.
ఇదీ చదవండి:లాక్డౌన్ రూల్స్ బ్రేక్- వేల మందితో దిల్లీ బస్టాండ్ కిటకిట
