బిహార్లో నితీశ్ కుమార్కు చెక్ పెట్టేందుకు భాజపా ప్రయత్నిస్తోందా? లోక్ జనశక్తి పార్టీ(ఎల్జేపీ)ని అందుకోసం వినియోగించుకుంటోందా? అంటే...అవుననే సమాధానమే సర్వత్రా వినిపిస్తోంది. బిహార్లో రోజురోజుకూ మారుతున్న రాజకీయ సమీకరణాలు పరిశీలిస్తే ఈ విషయం అర్థమవుతోంది. ఎన్నికలు సమీపిస్తున్న తరుణంలో ఎన్డీఏ నుంచి ఎల్జేపీ బయటకు రావటం గురించి అటు కేంద్రంలోనూ, ఇటు రాష్ట్రంలోనూ ఏ ఒక్క భాజపా నేత కూడా నోరు విప్పకపోవటం పలు అనుమానాలకు దారి తీస్తోంది. ఎల్జేపీ, జేడీయూ మధ్య ముదురుతున్న విభేదాల్ని తమకు అనుకూలంగా మార్చుకునేందుకు భాజపా ప్రయత్నిస్తున్నట్లు తెలుస్తోంది. "మోదీకి అనుకూలం-నితీశ్కు వ్యతిరేకం" అని ఎల్జేపీ చేస్తున్న నినాదం ఈ అనుమానాలకు మరింత బలాన్ని చేకూరుస్తోంది.
నితీశ్ను పక్కన పెట్టేందుకే ఎల్జేపీని భాజపా ప్రోత్సహిస్తోందని రాజకీయ విశ్లేషకులు భావిస్తున్నారు. బిహార్ ఎన్నికల్లో ముఖ్యమంత్రి అభ్యర్థిగా నితీశ్ను ఎన్డీఏ ఖరారు చేయటం కూడా ఈ వ్యూహంలో భాగమేనని వారు విశ్వసిస్తున్నారు. భవిష్యత్తులో నితీశ్ ధిక్కార స్వరం వినిపిస్తే..ప్రారంభం నుంచీ ఆయనకు తాము ప్రాధాన్యమిచ్చామని భాజపా చెప్పుకొనేందుకు వీలుంటుంది. ఒకవేళ నితీశ్ తనకు తానుగా తప్పుకుంటే అందుకు తమ బాధ్యత ఉండదని భాజపా చెప్పుకోవచ్చు. గతంతో పోలిస్తే భాజపాతో నితీశ్కు దూరం పెరుగుతూ వస్తోంది. మరో వైపు ప్రధాని మోదీకి ఉన్న ప్రజాదరణతో పోటీ చేసిన అన్ని స్థానాల్లో సులభంగా గెలుస్తుందని భాజపా విశ్వసిస్తోంది.
నితీశ్పై అసమ్మతి
బిహార్లో నితీశ్ కుమార్కు వ్యతిరేకంగా అసమ్మతి నేతలు పని చేస్తున్నారనేది విస్మరించలేని వాస్తవం. అందుకు కారణాలు చాలానే ఉన్నాయి. అయితే ఈ అంశాన్ని తనకు అనుకూలంగా మలుచుకోవాలని భాజపా భావిస్తోంది. భాజపాకు సాయం చేయటానికి కేవలం జేడీయూ పోటీ చేస్తున్న 143 స్థానాల్లోనే ఎల్జేపీ అభ్యర్థలను బరిలో నిలపడాన్ని చూస్తే ఈ విషయం అర్థమవుతోంది. దీంతో జేడీయూ ఓట్లు చీల్చే ప్రయత్నం జరుగుతోందనటంలో ఎలాంటి సందేహమూ లేదు. ఇదే జరిగితే కూటమిలో 'రెండో పార్టీ' అనే పేరును దూరం చేసుకోవటానికి భాజపాకు సువర్ణావకాశం దక్కినట్లే. అప్పుడు బిహార్లో భాజపా పెద్ద పార్టీగా అవతరిస్తుంది. అంతా అనుకున్నట్లు జరిగితే తమ పార్టీకి చెందిన వ్యక్తినే సీఎం అభ్యర్థిగా ప్రకటించే వీలు కమలదళానికి కలుగుతుంది.
వ్యూహాత్మకంగా చిరాగ్ అడుగులు
బిహార్ ఎన్నికలకు సంబంధించి సీట్ల సర్దుబాటు ప్రక్రియలో తాము కోరుకున్న స్థానాన్ని కేటాయించకపోయినప్పటికీ ఎల్జేపీ..భాజపాను ఎందుకు విమర్మించలేదనే అంశం సర్వత్రా చర్చనీయాంశమయింది. కాషాయ పార్టీకి చిరాగ్ విధేయుడిగా వ్యవహరించటం, నితీశ్కు వ్యతిరేకిగా మారటం వెనుక ఎల్జేపీని ఉపయోగించుకొని భాజపా లబ్ధి పొందాలనుకుంటోందని అర్థమవుతోంది. అయితే చిరాగ్ సైతం బిహార్లో తన స్థానాన్ని పదిలం చేసుకోవాలనుకుంటున్నారు. మరోవైపు కూటమిలోని చిన్న పార్టీల మనుగడ సాగనీయకుండా నితీశ్ ప్రయత్నిస్తున్నారని ఆరోపణలున్నాయి. ఈ నేపథ్యంలో ఆయనతో కలిసి ప్రయాణించటం ఇక ఎంతమాత్రమూ శ్రేయస్కరం కాదని చిరాగ్ భావిస్తున్నారు. సీట్ల సర్దుబాటు సమయంలోనూ తాము కచ్చితంగా ఓడిపోయే స్థానాలనే జేడీయూ తమకు కేటాయించాలనుకోవటంతో చిరాగ్ మరింత అప్రమత్తమయ్యారు. తన కుమారుడు బిహార్ రాజకీయాల్లో కీలకంగా మారాలని రాంవిలాస్ పాసవాన్ సైతం భావిస్తున్నారు. అందుకోసం తన కేంద్రమంత్రి పదవిని కూడా త్యాగం చేసేందుకు ఆయన సిద్ధంగా ఉన్నారు.
వచ్చేది భాజపా-ఎల్జేపీ ప్రభుత్వమే: చిరాగ్
బిహార్లో భాజపాతో కలిసి తాము ప్రభుత్వాన్ని ఏర్పాటు చేయనున్నామని లోక్జనశక్తి పార్టీ (ఎల్జేపీ)అధ్యక్షుడు చిరాగ్ పాసవాన్ తెలిపారు. నితీశ్ కుమార్తో విభేదించి ఎన్డీఏ నుంచి బయటకు వచ్చిన చిరాగ్..జేడీయూ అభ్యర్థులకు ఓటు వేయొద్దని ప్రజలకు విజ్ఞప్తి చేశారు. ఈ మేరకు ఆయన ఓటర్లకు బహిరంగ లేఖ రాశారు. జేడీయూతో ఏర్పడిన సైద్ధాంతిక విభేదాల కారణంగా నితీశ్ నాయకత్వాన్ని అంగీకరించబోమంటూ ఆ పార్టీ అభ్యర్థులకు వ్యతిరేకంగా తమ పార్టీ నేతలను బరిలో నిలపడానికి ఎల్జేపీ ఆదివారం నిర్ణయించింది. "ఇది నిర్ణయాత్మకమైన సమయం. 12కోట్ల మంది రాష్ట్ర ప్రజల భవితవ్యం ఈ ఎన్నికలపైనే ఆధారపడి ఉంది. ఇందులో ఎల్జేపీ పోరాడి గెలుస్తుంది.మాపార్టీ ఎమ్మెల్యేలంతా ప్రధాని మోదీ నాయకత్వంలో పని చేస్తారు." అని చిరాగ్ తెలిపారు.
భాజపా విజయానికి ఆర్జేడీయే తోడ్పడుతోంది
బిహార్లో భాజపా విజయానికి ఆర్జేడీయే తోడ్పడుతోందని ఏఐఎమ్ఐఎమ్ నేత, హైదరాబాద్ ఎంపీ అసదుద్దీన్ ఒవైసీ ఆరోపించారు. భాజపా విజయం కోసమే తాము బిహార్లో పోటీ చేస్తున్నట్లు వచ్చిన ఆరోపణలను ఆయన ఖండించారు. మైనారిటీల ఓట్లను చీల్చేందుకు వచ్చిన వ్యక్తిగా తనపై ఆర్జేడీ చేసిన వ్యాఖ్యలపై ఒవైసీ తీవ్రంగా స్పందించారు. బిహార్లో 2019ఎన్నికల్లో ఆర్జేడీ పరాభవానికి తమ పార్టీ ఏ విధంగా కారణమని ప్రశ్నించారు. మహాకూటమిలోని మరో ప్రధాన పార్టీ కాంగ్రెస్పైనా ఆయన విమర్శలు గుప్పించారు. మహారాష్ట్రలో తమతో కలిసి పోటీ చేసిన కాంగ్రెస్... అనంతరం శివసేనతో కలిసి ప్రభుత్వాన్ని ఏర్పాటు చేసిన విషయాన్ని గుర్తు చేశారు.
