'శివసేనకేనా? మాకూ ఉన్నాయి ప్రత్యామ్నాయాలు!'

మహారాష్ట్రలో శివసేనకు ప్రత్యామ్నాయాలు ఉంటే.. భాజపాకూ ఉంటాయని ఆ పార్టీ నేత, రాష్ట్ర మంత్రి సుధీర్​ ముంగంటివార్​ స్పష్టం చేశారు. కానీ ప్రజల అభీష్టం మహా కూటమి ప్రభుత్వమేనని స్పష్టం చేశారు.

మహారాష్ట్రలో ప్రభుత్వ ఏర్పాటుపై ప్రతిష్టంభన నెలకొన్న వేళ భాజపా, శివసేన మధ్య మాటల యుద్ధం రోజురోజుకూ తీవ్రమవుతోంది. రెండు పార్టీల నేతలు పరస్పరం ఆరోపణలు చేసుకుంటున్నారు. తమ పార్టీకి ప్రత్యామ్నాయ మార్గాలున్నాయని శివసేన నేత సంజయ్​ రౌత్​ వ్యాఖ్యలను తిప్పికొట్టారు రాష్ట్ర మంత్రి, భాజపా నేత సుధీర్ ముంగంటివార్.

"హరియాణాలో భాజపా, దుష్యంత్ చౌతాలా పార్టీ జేజేపీ కలిసి పోటీ చేయలేదు. కూటమి అంటే ఒప్పందం. కానీ ఇలాంటి ప్రకటనలు 'వినాశ కాలే విపరీత బుద్ధి' అనే సామెతకు అద్దం పడతాయి.

శివసేనకు ప్రత్యామ్నాయాలు ఉన్నప్పుడు భాజపాకు ఉండవా? భాజపాకూ ఉన్నాయి. శివసేనకు చాలా మంది మద్దతుగా వస్తున్నట్లయితే.. అలాగే భాజపాకు మద్దతిచ్చేందుకు చాలా మంది ముందుకు వస్తారు. ఇక్కడ సమస్య ఏమిటంటే.. కూటమి ప్రభుత్వాన్ని ఏర్పాటు చేయాలనే ప్రజలు తీర్పు ఇచ్చారు."

- సుధీర్ ముంగంటివార్, భాజపా నేత

మహారాష్ట్రలో జరిగిన శాసనసభ ఎన్నికల్లో 288 స్థానాలకు గానూ భాజపా 105, శివసేన 56 సీట్లను కైవసం చేసుకున్నాయి. ప్రభుత్వం ఏర్పాటు చేయాలంటే రెండు పార్టీలు పరస్పరం ఆధారపడాల్సి ఉంటుంది.

నేడు భాజపా భేటీ

అయితే శివసేన సీఎం పదవి చెరిసగం పంచుకోవాలని ప్రతిపాదించగా భాజపా అందుకు నిరాకరిస్తుండటం వల్ల ప్రతిష్టంభన నెలకొంది. ఈ రోజు శాసనసభా పక్షనేత ఎంపిక కోసం భాజపా నూతన ఎమ్మెల్యేలు విధాన్​ భవన్​లో భేటీ కానున్నారు.

ఇదిలా ఉంటే.. రెండు పార్టీలకు పలువురు స్వతంత్రుల మద్దతు లభిస్తోంది. ఇప్పటివరకు భాజపాకు మద్దతుగా ఆరుగురు స్వతంత్రులు మద్దతు ప్రకటించగా.. శివసేనకు ఇద్దరు దగ్గరయ్యారు.

ఇదీ చూడండి: 'మహా'ప్రతిష్టంభన: మిత్రపక్షాల మధ్య పెరిగిన దూరం