దిల్లీ దంగల్​: 'భాజపా.. ఆప్​... ఓ ఆటోవాలా'

దిల్లీ ఎన్నికలు దగ్గరపడుతున్న కొద్దీ.. ప్రచారాల హోరు జోరందుకుంటోంది. తాజాగా భాజపా- ఆప్​ మధ్య 'ఆటోవాలా' దుమారం రేగింది. తన మీద ఉన్న ప్రేమతో ఆటో వెనుక 'ఐ లవ్​ కేజ్రీవాల్​' అని ఓ డ్రైవర్​ రాసుకున్నాడని.. అది తట్టుకోలేకే భాజపా అతడిపై చలాన్ల రూపంలో విరుచుకుపడిందని ఆరోపించారు దిల్లీ ముఖ్యమంత్రి.

దిల్లీలో ఎన్నికల ప్రచారం వాడివేడిగా సాగుతోంది. తాజాగా భాజపా లక్ష్యంగా దిల్లీ ముఖ్యమంత్రి అరవింద్​ కేజ్రీవాల్​ తీవ్ర విమర్శలు చేశారు. తనను ఓడించడానికి స్థానిక ఆటో డ్రైవర్లపై భాజపా సర్కారు తన ప్రతాపాన్ని చూపిస్తోందని ఆరోపించారు. తనపై ప్రేమను కురిపిస్తుండటం వల్లే ఓ ఆటోవాలాలపై చలాన్లతో విరుచుకుపడ్డారని పేర్కొన్నారు. ఇందుకు సంబంధించిన మీడియా కథనాలను చూపిస్తూ కేజ్రీవాల్​ ట్వీట్​ చేశారు.

"భాజపా తన పోలీసులతో నకిలీ చలాన్లు సృష్టించి... పేద డ్రైవర్లను చిత్రహింసలు పెడుతోంది. 'ఐ లవ్​ కేజ్రీవాల్​' అని తన ఆటోపై రాసుకోవడమే ఆ డ్రైవర్​ చేసిన తప్పు. అందుకే 10వేల రూపాయలు చలానా వేశారు. ఇలా చేయడం సరికాదు. పేద వారిపై ప్రతీకారం తీర్చుకోవడం మానుకోండి."
--- అరవింద్​ కేజ్రీవాల్​, దిల్లీ ముఖ్యమంత్రి

కేజ్రీవాలే మరోమారు దిల్లీ ముఖ్యమంత్రి కావాలంటూ ఆమ్​ ఆద్మీ 'ఐ లవ్​ కేజ్రీవాల్​' ప్రచార కార్యక్రమాన్ని ఏర్పాటు చేసింది. ఇందులో భాగంగా అనేక మంది డ్రైవర్లు తమ ఆటో వెనుక ఆ నినాదాన్ని ముద్రించుకున్నారు.

దిల్లీ కోర్టులో...

అయితే చలాన్​ వ్యవహారంపై దిల్లీ కోర్టులో వ్యాజ్యం దాఖలైంది. విచారణ చేపట్టిన అనంతరం.. ఘటనపై స్పందించాలని ఆప్​ ప్రభుత్వం, పోలీసులు, ఎన్నికల సంఘానికి దిల్లీ కోర్టు నోటీసులు జారీ చేసింది. డ్రైవర్​ చర్య.. ఎన్నికల నియామావళికి విరుద్ధంగా ఉండొచ్చని ఎన్నికల సంఘం అధికారులు అభిప్రాయపడ్డారు.