'మహా'లో మళ్లీ భాజపా-సేనదే అధికారం- పీఠం చెరిసగం!

మహారాష్ట్ర శాసనసభ ఎన్నికల్లో అధికారం భాజపా-శివసేనదేనని ఖరారైంది. మొత్తం 161 స్థానాలు నెగ్గి సాధారణ మెజార్టీ సాధించింది అధికార కూటమి. కాంగ్రెస్​-ఎన్సీపీ కూటమి 98 చోట్ల గెలిచి మరోసారి ప్రతిపక్షానికే పరిమితమైంది. ఇతరులు 29 చోట్ల గెలుపొందారు.

మహారాష్ట్రలో అధికార కూటమి తిరిగి ప్రభుత్వాన్ని ఏర్పాటుచేయనుంది. పూర్తి ఫలితాలపై స్పష్టత వచ్చింది. భాజపా-శివసేన కూటమి 161 స్థానాల్లో గెలుపొందింది. ఇందులో కాషాయ పార్టీ 105, సేన 56 స్థానాలు కైవసం చేసుకున్నాయి. ఎగ్జిట్​ పోల్స్​ అంచనాలను తలకిందులు చేస్తూ... కాంగ్రెస్​-ఎన్సీపీలు అధికార కూటమికి గట్టి పోటీనే ఇచ్చాయి. 98 చోట్ల నెగ్గినా మరోసారి ప్రతిపక్షానికే పరిమితమవనుంది.

పార్టీ	గెలిచిన స్థానాలు
భాజపా	105
శివసేన	56
కాంగ్రెస్​	44
ఎన్సీపీ	54
ఇతరులు	29
మొత్తం	200

ఇప్పటికే మెజార్టీ సాధించిన భాజపా-శివసేన నేతృత్వంలో ప్రభుత్వ ఏర్పాటు ఖరారైన నేపథ్యంలో సీఎం పదవిపై సందిగ్ధం నెలకొంది. ముఖ్యమంత్రి పీఠాన్ని చెరో రెండున్నరేళ్లు పంచుకునేలా ప్రతిపాదన తెచ్చింది శివసేన. ప్రభుత్వ ఏర్పాటుకు అవసరమైన మెజార్టీ సొంతంగా సాధించని భాజపా అందుకు అంగీకరించినట్లే సంకేతాలిచ్చింది. ఈ నేపథ్యంలో శివసేన నుంచి కూడా ఈ సారి ముఖ్యమంత్రిని చూసే అవకాశముంది.

తగ్గిన మెజారిటీ...

2014 అసెంబ్లీ ఎన్నికల్లో భాజపా 122, శివసేన 63 స్థానాల్లో గెలుపొందాయి. కాంగ్రెస్​ 42, ఎన్సీపీ 41 చోట్ల నెగ్గాయి. భాజపా-శివసేన కలిసి ప్రభుత్వాన్ని ఏర్పాటు చేశాయి. ఈ సారి భాజపా జోరుకు కాంగ్రెస్​-ఎన్సీపీ కాస్త బ్రేక్​ వేసిందనే చెప్పాలి.

భాజపా సంబరాలు..

గెలుపు ఖరారైన నేపథ్యంలో భాజపా నేతలు, కార్యకర్తలు సంబరాలు చేసుకున్నారు. ఇప్పటికే మహారాష్ట్రలోని పార్టీ కార్యాలయంలో ముఖ్యమంత్రి దేవేంద్ర ఫడణవిస్​.. పార్టీ కార్యకర్తలతో కలిసి సంబరాల్లో పాల్గొన్నారు. బాణాసంచా పేలుళ్లతో అభిమానులు తమ సంతోషాన్ని వ్యక్తం చేస్తున్నారు.

ఎన్నికల్లో పోటీ చేసిన ప్రముఖులు జయభేరి మోగించారు. భాజపా సీఎం అభ్యర్థి ఫడణవిస్​, కాంగ్రెస్​ నేతలు అశోక్​ చవాన్​, పృథ్వీరాజ్​ చవాన్​, ఎన్సీపీ నుంచి అజిత్​ పవార్​ ఘన విజయం సాధించారు. శివసేన అభ్యర్థి ఆదిత్య ఠాక్రే సహా పలువురు ముఖ్యులు గెలిచారు.