కర్ణాటక రాజకీయ సంక్షోభంపై అనిశ్చితి వీడేలా ఉంది. సోమవారం జరిగిన నాటకీయ పరిణామాలు.. సంకీర్ణ సర్కారు భవితవ్యంపై ఉత్కంఠను మరింత పెంచాయి. సుప్రీంతో పాటు స్పీకర్ నిర్ణయంపైనే కన్నడ రాజకీయాలు ఆధారపడి ఉన్నాయి.
నేడు సోమవారం కర్ణాటక శాసనసభ సమావేశాల ప్రారంభానికి ముందు బీఏసీ సమావేశమైంది. బలపరీక్ష కోసం ఒత్తిడి తెచ్చింది భాజపా. సుప్రీం కోర్టు విచారణ తర్వాత.. నిర్ణయం తీసుకుందామని సభ్యులకు సూచించారు స్పీకర్. అయితే.. ఎంతకూ తగ్గని కాషాయ పార్టీ.. అవిశ్వాస తీర్మాన నోటీసును స్పీకర్కు అందించింది. చివరకు.. ఈ నెల 18న సీఎం విశ్వాస పరీక్ష ఎదుర్కోవాలని ప్రభుత్వాన్ని ఆదేశించారు సభాపతి. అనంతరం.. కాంగ్రెస్ శాసనసభా పక్ష నేత సిద్ధరామయ్య దీనిపై స్పష్టతనిచ్చారు. 18న ఉదయం 11 గంటలకు విశ్వాస పరీక్షపై చర్చ ప్రారంభమవుతుందని వెల్లడించారు.
సుప్రీంలో రేపే విచారణ...
కర్ణాటకలో ఇప్పటికే 16 మంది ఎమ్మెల్యేలు శాసనసభ్యత్వానికి రాజీనామా చేశారు. వీరిలో ఇదివరకు 10 మంది ఎమ్మెల్యేలు.. స్పీకర్ తమ రాజీనామాల్ని ఆమోదించేలా ఆదేశించాలని సుప్రీంను ఆశ్రయించారు. అనంతరం.. మరో ఐదుగురు అదే బాట పట్టారు. వీరి పిటిషన్లపై మంగళవారం వాదనలు విననుంది అత్యున్నత న్యాయస్థానం.
16 మందిలో కాంగ్రెస్ నుంచి 13, జేడీఎస్ నుంచి ముగ్గురు శాసనసభ్యులున్నారు. మరో ఇద్దరు స్వతంత్ర ఎమ్మెల్యేలు శంకర్, నగేశ్ ప్రభుత్వానికి మద్దతు ఉపసంహరించుకున్నారు.
స్పీకర్తో కలిపి సంకీర్ణ ప్రభుత్వం బలం 116గా ఉంది. (కాంగ్రెస్-78, జేడీఎస్-37, బీఎస్పీ-1)