భాజపా నేతను కాల్చి చంపిన దుండగులు

బంగాల్​ ఉత్తర 24 పరగణాల జిల్లాలో ఓ స్థానిక భాజపా కౌన్సిలర్​ను దారుణంగా కాల్చి చంపారు దుండగులు. ఆదివారం రాత్రి 9.30 గంటల ప్రాంతంలో ఇద్దరు వ్యక్తులు ద్విచక్రవాహనంపై వచ్చి కాల్పులు చేసినట్లు పోలీసులు తెలిపారు. ఘటనపై స్పందించిన భాజపా నాయకత్వం.. అధికార పార్టీ టీఎంసీనే ప్రత్యర్థులపై దాడులకు పాల్పడుతోందని ఆరోపించింది. సీబీఐ దర్యాప్తునకు డిమాండ్​ చేసింది.

బంగాల్​లో దారుణ ఘటన జరిగింది. ఉత్తర 24 పరగణాల జిల్లా టిటాగఢ్​లో ఓ స్థానిక భాజపా నేతను కాల్చి చంపారు దుండగులు. ద్విచక్రవాహనంపై వచ్చిన ఇద్దరు కాల్పులకు తెగబడినట్లు పోలీసులు తెలిపారు.

బీటీ రోడ్డు ప్రాంతంలో స్థానిక కౌన్సిలర్​ మనీశ్​​ శుక్లాపై రాత్రి 9.30 గంటల ప్రాంతంలో కాల్పులు జరిపారు దుండగులు. స్థానిక ప్రైవేటు ఆసుపత్రికి తీసుకెళ్లగా అప్పటికే మృతి చెందినట్లు వైద్యులు ధ్రువీకరించారు. టిటాగఢ్​ పోలీస్​ స్టేషన్​కు సమీపంలోనే హత్య జరగటం గమనార్హం.

సమాచారం మేరకు ఘటనా స్థలికి పెద్ద ఎత్తున పోలీసులు చేరుకొని తనిఖీలు చేపట్టారు. అన్ని కోణాల్లో దర్యాప్తు చేపట్టి బాధ్యతులపై కఠిన చర్యలు తీసుకుంటామని సీనియర్​ అధికారి ఒకరు తెలిపారు.

సీబీఐ దర్యాప్తునకు డిమాండ్​.

కాల్పులకు పాల్పడింది అధికార తృణమూల్​ కాంగ్రెస్ అని ఆరోపించింది భాజపా నాయకత్వం. సీబీఐ దర్యాప్తు చేపట్టాలని డిమాండ్​ చేసింది. శుక్లా హత్యకు అధికార టీఎంసీనే బాధ్యత వహించాలని భాజపా ఎంపీ అర్జున్​ సింగ్ డిమాండ్​ చేశారు.​

" ప్రత్యర్థులు లేకుండా చేసే రాజకీయాలను టీఎంసీ ప్రారంభించటం సిగ్గుచేటు. పోలీస్​ స్టేషన్​ ఎదుటే ఈ ఘటన జరిగిన క్రమంలో స్థానిక పోలీసులపై మాకు నమ్మకం లేదు. సీబీఐ దర్యాప్తు చేయాలి."

- కైలాస్​ విజయ్​వర్గియా, భాజపా జాతీయ ప్రధాన కార్యదర్శి.

నిరాధార ఆరోపణలు..

శుక్లా హత్యపై భాజపా ఆరోపణలను ఖండించింది తృణమూల్​ కాంగ్రెస్​. భాజపా అంతర్గత కలహాలే కౌన్సిలర్​ హత్యకు దారితీశాయని, తమపై నిరాధారమైన ఆరోపణలు చేయటం సరికాదన్నారు టీఎంసీ సీనియర్​ నేత నిర్మల్​ ఘోష్​.

బంద్​కు పిలుపు..

భాజపా కౌన్సిలర్​ మనీశ్​ శుక్లా హత్యను నిరసిస్తూ బరక్​పోరా ప్రాంతంలో సోమవారం 12 గంటల బంద్​కు పిలుపునిచ్చింది భాజపా. ఈ బంద్​ను విజయవంతం చేయాలని కోరారు రాష్ట్ర భాజపా ప్రధాన కార్యదర్శి సంజయ్​ సింగ్​.

శాంతిభద్రతలపై గవర్నర్​ ఆందోళన..

రాష్ట్రంలో జరుగుతున్న హింసాకాండలతో శాంతిభద్రతలపై ఆందోళన వ్యక్తం చేశారు రాష్ట్ర గవర్నర్​ జగదీప్​ ధనఖర్​. ఈ ఘటనపై సమాధానం ఇవ్వాలని కోరుతూ.. హోంశాఖ అదనపు ప్రధాన కార్యదర్శి, డీజీపీకి సమన్లు జారీ చేశారు. సోమవారం తనముందు హాజరుకావాలని ఆదేశించారు.

ఇదీ చూడండి: గురుగ్రామ్​లో మరో నిర్భయ ఘటన