మహిళలపై నేరాలకు పాల్పడిన కేసులు ఎదుర్కొంటున్న చట్టసభ్యుల వివరాలతో అసోసియేషన్ ఫర్ డెమొక్రటిక్ రిఫామ్స్(ఏడీఆర్) నివేదిక రూపొందించింది. దీని ప్రకారం.. భాజపా నుంచి అత్యధికంగా 21మంది చట్టసభ్యులపై కేసులున్నాయి. కాంగ్రెస్ 16, వైఎస్ఆర్సీపీ 7తో తర్వాతి స్థానాల్లో ఉన్నాయి.
4 వేల 896 మంది ప్రస్తుత చట్టసభ్యుల్లో(ఎంపీలు-759, ఎమ్మెల్యేలు 4063) 4 వేల 822 మంది ఎన్నికల అఫిడవిట్లను విశ్లేషించి ఈ నివేదిక తయారు చేసింది ఏడీఆర్. 2009లో ఇద్దరు లోక్సభ ఎంపీలపై కేసులుంటే... 2019కి ఆ సంఖ్య 19కి చేరిందని తెలిపింది.
"తమపై అత్యాచార కేసులున్నాయని ముగ్గురు ఎంపీలు, ఆరుగురు ఎమ్మెల్యేలు ప్రకటించారు. గుర్తింపు ఉన్న పార్టీలు.. నేర చరిత్ర ఉన్న 41మంది అభ్యర్థులకు గత ఐదేళ్లల్లో టికెట్లిచ్చాయి. "
- అసోసియేషన్ ఫర్ డెమొక్రటిక్ రిఫామ్స్
నివేదికలోని మరిన్ని అంశాలు...
- ఐదేళ్లలో మహిళలపై నేరాలకు పాల్పడినట్టు కేసులను ఎదుర్కొంటున్న 66మందిని భాజపా ఎన్నికల బరిలో దింపింది. కాంగ్రెస్-46, బహుజన్ సమాజ్ పార్టీ-40 తర్వాతి స్థానాల్లో ఉన్నాయి. మొత్తం 572 మంది అభ్యర్థులు ఎన్నికల్లో పోటీపడ్డారు.
- ఈ అభ్యర్థులెవరినీ ఇంకా దోషులుగా నిర్ధరించలేదు.
- అదే కాలంలో కేసులున్న లోక్సభ అభ్యర్థుల సంఖ్య 38 నుంచి 126కు(231శాతం) పెరిగింది.
- అత్యధికంగా బంగాల్లో 16మంది(ఎంపీలు/ఎమ్మెల్యేలు)పై కేసులున్నాయి. ఆ తర్వాతి స్థానాల్లో ఒడిశా(12), మహారాష్ట్ర ఉన్నాయి(12).
ఇదీ చూడండి:- మహిళపై నేరాల్లో అత్యాచారాలదే అగ్రస్థానం
