"పార్టీ పెద్ద బాధ్యతను అప్పగించింది"

భాజపా తనకు అతిపెద్ద బాధ్యతను అప్పగించిందని గోవా ముఖ్యమంత్రిగా ప్రమాణస్వీకారం చేసిన ప్రమోద్​ సావంత్​ అన్నారు. గోవా అభివృద్ధికి తన శాయశక్తులా కృషి చేస్తానని వెల్లడించారు.

భాజపా తనకు అతిపెద్ద బాధ్యతను అప్పగించిందని గోవా నూతన ముఖ్యమంత్రి ప్రమోద్​ సావంత్​ అన్నారు. దివంగత ముఖ్యమంత్రి మనోహర్​ పారికర్​లా పని చేయలేకపోయిప్పటికీ... గోవా అభివృద్ధికి తాను శాయశక్తులా కృషి చేస్తానని స్పష్టం చేశారు.

" పార్టీ నాకు పెద్ద బాధ్యత అప్పగించింది. ఆ విధంగానే మంచిగా పనిచేయాలనుకుంటున్నా. ఈ రోజు ఒకటి చెప్పాలనుకుంటున్నా... మనోహర్​ పారికరే నన్ను రాజకీయాల్లోకి తీసుకొచ్చారు. స్పీకర్​ని చేశారు. ఇప్పుడు రాష్ట్రంలో అసంపూర్తిగా ఉన్న పనులు ముందుగా పూర్తి చేయాలనుకుంటున్నాం. మనోహర్​ పారికర్​లా పని చేయకపోవచ్చు. కానీ రాష్ట్రాభివృద్ధికి నా శాయశక్తులా కృషి చేస్తా" - ప్రమోద్​ సావంత్​, గోవా​ ముఖ్యమంత్రి.

పారికర్​కు విధేయుడిగా​

ఆయుర్వేద వైద్యుడి నుంచి గోవా ముఖ్యమంత్రి వరకు ఎదిగారు ప్రమోద్​ సావంత్​. ఆర్​ఎస్​ఎస్​ నాయకుడైన ప్రమోద్... దివంగత ముఖ్యమంత్రి మనోహర్​ పారికర్​కు మద్దతుదారుడిగా, విధేయుడిగా మంచి​ గుర్తింపు పొందారు. భాజపాలో యువజన నాయకుడిగా రాజకీయ జీవితాన్ని ప్రారంభించారు. పారికర్​తో ఎన్నో సందర్భాల్లో కలిసి పనిచేసిన అనుభవం ప్రమోద్​ సొంతం.

ఉత్తర గోవాలోని సంఖలిమ్​ నియోజకవర్గం నుంచి 2012, 2017లో ఎమ్మెల్యేగా గెలుపొందారు. 2017లో అసెంబ్లీ స్పీకర్​గా బాధ్యతలు చేపట్టారు. గతంలో గోవా మౌళిక సదుపాయాల అభివృద్ధి సంస్థ​ ఛైర్మన్​గానూ పనిచేశారు.