దిల్లీ దంగల్​: జేడీయూ,ఎల్​జేపీతో కలిసి భాజపా పోటీ

దిల్లీ అసెంబ్లీ ఎన్నికల్లో... ఎన్డీఏ కూటమి పక్షాలైన జేడీయూ, ఎల్​జేపీ పార్టీలతో కలిసి పోటీ చేయనున్నట్లు ప్రకటించింది భాజపా. ఈ మేరకు ఆ రాష్ట్ర  భాజపా అధ్యక్షుడు మనోజ్​ తివారీ ప్రకటన విడుదల చేశారు. మొత్తం 70 నియోజకవర్గాల్లో.. 3 స్థానాలను మిత్రపక్షాలకిచ్చి 67 సీట్లలో కమల దళం పోటీచేయనుంది.

దిల్లీ అసెంబ్లీ ఎన్నికల్లో మిత్రపక్షాలైన జేడీయూ, ఎల్​జేపీ పార్టీలతో కలిసి బరిలో దిగనున్నట్టు భాజపా ప్రకటించింది. సంయుక్తంగా పోటీ చేయడం ద్వారా దేశానికి ఓ బలమైన సందేశం అందుతుందని దిల్లీ భాజపా అధ్యక్షుడు మనోజ్​ తివారీ పేర్కొన్నారు.

పౌరసత్వ చట్ట సవరణకు వ్యతిరేకంగా మిత్రపక్షమైన శిరోమణి అకాలీదళ్​​.. కాషాయ పార్టీతో పొత్తు కుదుర్చుకోవడానికి నిరాకరించింది. ఈ నేపథ్యంలో ఎన్డీఏలోని జేడీయూ, ఎల్​జేపీతో కలిసి పోటీ చేస్తోంది భాజపా.

మొత్తం 70 స్థానాలున్న దిల్లీ శాసనసభలో 67 సీట్లల్లో భాజపా పోటీ చేస్తుండగా... ఎల్​జేపీ ఒక స్థానం, జేడీయూ 2 స్థానాల్లో బరిలోకి దిగనున్నాయి.

"ఈ కూటమి దిల్లీలో ఇదివరకూ ఎన్నడూ చూడని ఉత్సాహాన్ని అందిస్తుంది. బిహార్​లో పట్టున్న జేడీయూ, ఎల్​జేపీ.. దిల్లీలోని67మందిభాజపా అభ్యర్థులకు మద్దతు ఇవ్వనున్నాయి. జేడీయూ అధ్యక్షుడు నితీశ్​ కుమార్​ భాజపా అభ్యర్థుల తరఫున ప్రచారాలు చేయనున్నారు."

-మనోజ్​ తీవారీ, దిల్లీ భాజపా అధ్యక్షుడు.

ఫిబ్రవరి 8న దిల్లీ ఎన్నికలు జరగనున్నాయి. 11న ఫలితాలు ప్రకటించనున్నారు.

ఇదీ చూడండి : కేజ్రీకి షాక్​- నామినేషన్​ వేసేందుకు గంటలుగా వెయిటింగ్