వడదెబ్బ తగిలిన పక్షుల కోసం ఆసుపత్రి

గుజరాత్​ అహ్మదాబాద్​లో ఎండ నుంచి పక్షులు, జంతువులను కాపాడేందుకు కొన్ని స్వచ్ఛంద సంస్థలు ముందుకొచ్చాయి. ఓ ఆసుపత్రిని ఏర్పాటు చేశాయి.

ఏటా వేసవిలో ఉష్ణోగ్రతల స్థాయి పెరుగుతూ వస్తోంది. భూతాపంతో మార్చిలోనే కొన్నిచోట్ల 45 డిగ్రీల సెల్సియస్​తో విరుచుకుపడుతోంది ఎండాకాలం. మధ్యాహ్నం వేళ బయటకు వెళ్లామా అంతే సంగతులు. మనుషుల పరిస్థితే ఇలా ఉంటే పక్షుల విషయంలో అంతకు మించి అన్నట్టు ఉంటుంది.

గుజరాత్​ అహ్మదాబాద్​లో వేసవి తాపానికి రాలిపోతున్న పక్షులను కాపాడే పనిలో పడ్డాయి కొన్ని స్వచ్ఛంద సంస్థలు. అందుకోసం ఓ ఆసుపత్రిని ఏర్పాటు చేశాయి.

నగరంలో వేడి తీవ్రత కారణంగా అస్వస్థతకు గురవుతున్న పక్షులను గుర్తించి వాటిని ఆసుపత్రికి తీసుకువస్తారు. త్వరగా కోలుకునేలా ప్రాథమిక చికిత్స చేస్తారు. డీహైడ్రేషన్​ తగ్గేందుకు ఓఆర్​ఎస్​ నీటిని అనివార్యంగా అందిస్తారు. ఆరోగ్యం మెరుగయ్యేంత వరకు పర్యవేక్షణలోనే ఉంచుతారు. మంచి ఆహారం అందిస్తారు. పక్షులు పూర్తిగా కోలుకున్నాక వదిలిపెడతారు.

ఇదీ చూడండి: రాహుల్ పౌరసత్వంపై రాజకీయ దుమారం