ఇలా అయితే రైలు బోగీల్లో కరోనా చికిత్స కష్టమే!

కరోనా రోగుల కోసం రైల్వేశాఖ ఏర్పాటుచేసిన కొవిడ్​ కోచ్​లు వేసవి ఉష్ణోగ్రతల వల్ల విపరీతంగా వేడెక్కిపోతున్నాయి. మరి ఇలాంటి వాటిలో కొవిడ్​ రోగులను ఉంచితే... వేడికి తట్టుకోలేక మాడిపోవడం ఖాయం. అలాగే కోచ్​లలో అమర్చిన పరికరాల పనితీరు దెబ్బతినే అవకాశం కూడా ఉంది. అందుకే రైల్వే అధికారులు బోగీల లోపల ఉష్ణోగ్రత తగ్గించే ప్రయత్నాలు చేస్తున్నారు.

అధునాతన బయో టాయిలెట్స్, హ్యాండ్​హెల్డ్​ షవర్స్, ఆక్సిజన్ సిలిండర్స్, పవర్ సాకెట్స్, మస్కిటో నెట్స్... ఇలా ఎన్నో సౌకర్యాలతో రైలు బోగీల్ని మినీ ఆస్పత్రులుగా మార్చింది భారతీయ రైల్వే. కరోనా కేసులు అంతకంతకూ పెరుగుతూ, దేశవ్యాప్తంగా ఆస్పత్రులు కిటకిటలాడుతున్న సమయంలో రోగులను ఇవే ఆదుకుంటాయని భావించింది. కానీ... అధికారుల లెక్క తప్పింది. కరోనా వార్డుల్లో సరిపడా పడకలు లేకపోయినా... రైలు బోగీల్ని వినియోగించుకునేందుకు స్థానిక యంత్రాంగాలు ముందుకు రావడం లేదు.

సిద్ధంగా ఉన్నాయ్​.. కానీ

దేశంలో కరోనా కేసులు విపరీతంగా పెరిగిపోతున్న నేపథ్యంలో రైల్వేశాఖ 5,321 నాన్​ ఏసీ స్లీబర్ క్లాస్​ కోచ్​లను కొవిడ్​ కేర్ లెవల్ 1 కేంద్రాలుగా మార్చింది. వీటిలో రోగ లక్షణాలు ఉన్నవారికి, పాజిటివ్​గా నిర్ధరణ అయిన వారికి వేర్వేరుగా చికిత్స అందించడానికి కూడా ఏర్పాట్లు చేసింది.

రైల్వేశాఖ ఇప్పటి వరకు 5 రాష్ట్రాలకు 960 బోగీలను కేటాయించింది. ముఖ్యంగా దిల్లీకి 503, ఉత్తర్​ప్రదేశ్​కు 372 బోగీలు సమకూర్చింది. వీటిలో వైద్య సిబ్బంది విశ్రాంతి తీసుకోవడానికి ప్రత్యేకంగా రెండు లేదా అంతకు మించి ఏసీ కోచ్​లు కూడా ఏర్పాటుచేసింది. అయితే వీటిని తీసుకెళ్లేవారు లేకుండా పోయారు.

ఇందుకు ప్రధాన కారణం వేసవి ఉష్ణోగ్రతలు. భానుడి ప్రతాపంతో రైలు బోగీలు విపరీతంగా (43 డిగ్రీ సెల్సియస్​ వరకు) వేడెక్కిపోతున్నాయి. ఇలాంటి పరిస్థితుల్లో కరోనా రోగులను వాటిలో ఉంచి, చికిత్స అందించడం చాలా కష్టం. బోగీల్లోని వైద్య పరికరాల పనితీరుపైనా ప్రభావం పడే అవకాశం ఉంది.

వేడి తగ్గించేందుకు

ప్రస్తుతం రైల్వే కోచ్​ల లోపల వేడి తగ్గించేందుకు అధికారులు అనేక ప్రయోగాలు చేస్తున్నారు. ముఖ్యంగా కిటికీలకు వెదురు బెండ్లు అమర్చడం, బోగీ పైకప్పుపై బబుల్ ర్యాప్ చేయడం, వేడి నిరోధక పూతలు పూయడం, కవర్ సీట్లు వాడడం, పోర్టబుల్ కూలర్లు పెట్టడం లాంటివి చేస్తున్నారు.

కొసమెరుపు ఏమిటంటే.. ఇవన్నీ కలిసి బోగీ లోపల ఉష్ణోగ్రతను 1 డిగ్రీ సెల్సియస్ మాత్రమే తగ్గించగలుగుతున్నాయి. ఐఐటీ ముంబయి వారి సాయంతో రైలు కోచ్​ల లోపల పోర్టబుల్ కూలర్​లు అమర్చారు. దీని వల్ల 3 డిగ్రీల సెల్సియస్ ఉష్ణోగ్రత మాత్రమే తగ్గింది. దీనితో ఒకవైపు రైలు బోగీల్లో ఉష్ణోగ్రతలు తగ్గించే ప్రయత్నాలు చేస్తూనే... వర్షాల కోసం ఎదురు చూస్తున్నారు అధికారులు.

ఇదీ చూడండి:జులై 1కి దేశంలో 6 లక్షల కరోనా కేసులు!