బిహార్​ బరి: రెండోదఫాలో 34శాతం మందిపై క్రిమినల్​ కేసులు!

బిహార్​ రెండోదఫాలో ఎన్నికల్లో బరిలోకి దిగనున్న అభ్యర్థుల్లో 34శాతం మంది నేర చరిత్ర ఉన్నవారేనని ప్రజాస్వామ్య సంస్కరణల సంఘం (ఏడీఆర్​) వెల్లడించింది. ఈ జాబితాలో 36 మంది అభ్యర్థులతో ఆర్​జేడీ తొలిస్థానంలో ఉండగా.. భాజపా 29, ఎల్​జేపీ 28 మందితో తరువాతి స్థానాల్లో ఉన్నాయని పేర్కొంది.

బిహార్​ అసెంబ్లీ ఎన్నికల్లో అభ్యర్థుల నేర చరిత్ర ప్రచార అస్త్రంగా మారిన వేళ.. ప్రజాస్వామ్య సంస్కరణల సంఘం(ఏడీఆర్​)ప్రకటన చర్చనీయాంశంగా మారింది.రెండోదఫా ఎన్నికల్లో పోటీ చేస్తున్న అభ్యర్థుల్లో మూడోవంతు మందికి నేర చరిత్ర ఉందని ప్రజాస్వామ్య సంస్కరణల సంఘం(ఏడీఆర్​) తెలిపింది. ఈ జాబితాలో రాష్ట్రీయ జనతాదళ్​(ఆర్​జేడీ) అత్యధిక సంఖ్యలో అభ్యర్థులను నిలబెట్టిందని ఏడీఆర్​ నివేదికలో పేర్కొంది.

34 శాతం మంది..

బిహార్​ శాసనసభ రెండోదశ ఎన్నికల్లో... అన్ని పార్టీల నుంచి 1,463 మంది అభ్యర్థులు పోటీ పడుతున్నారు. వీరిలో 34 శాతం మంది అంటే 502 మందిపై నేరారోపణలు ఉన్నట్లు ఏడీఆర్ తెలిపింది. ఈ జాబితాలో అత్యధికంగా ఆర్​జేడీ తరుఫున పోటీ చేస్తున్న 56 మందిలో 36మందిపై కేసులు ఉండగా.. భాజపాలో 29, లోక్​జన్​శక్తి పార్టీ(ఎల్​జేపీ) లో 28, బీఎస్​పీలో 16, జేడీ(యూ)లో 20, కాంగ్రెస్​లో 14మందికి క్రిమినల్​ కేసులు ఉన్నట్లు ఏడీఆర్​ నివేదికలో వెల్లడైంది. వీరిలో 27శాతం మందిపై అత్యాచారం, హత్య, దాడులు, అపహరణ వంటి తీవ్ర నేరారోపణ కేసులు ఉన్నాయని పేర్కొంది ఏడీఆర్​.

బిహర్​ అసెంబ్లీ ఎన్నికల్లో 64శాతం మందిని క్రిమినల్స్​గా ప్రకటించిన వారిలో 47శాతం మందికి ప్రధాన పార్టీలు టిక్కెట్​ ఇచ్చినట్లు ఏడీఆర్​ తెలిపింది.

495మంది కోటీశ్వరులు..

రెండో దశ ఎన్నికల బరిలోకి దిగుతున్నవారి సగటు ఆస్తి రూ.1.72 కోట్లు అని ఏడీఆర్​ పేర్కొంది. 1,463 మంది అభ్యర్థుల్లో 495 మంది కోటీశ్వరులని వెల్లడించింది. ఆర్​జేడీలో అధికంగా 49మంది, భాజపాలో 39 మంది, ఎల్​జేపీలో 38, జేడీ(యూ) 35, కాంగ్రెస్​ 24 మంది, బీఎస్​పీలో 11మంది కోటిశ్వరులని ఏడీఆర్ తెలిపింది.

నేరారోపణలు ఉన్న వారిని అభ్యర్థ్యులుగా ఎంపిక చేసుకోవడానికి గల కారణాలు, నేరారోపణలు లేని వారిని ఎందుకు ఎంపిక చేయడం లేదని సుప్రీంకోర్టు చేసిన వ్యాఖ్యలు బిహార్‌ శాసనసభ ఎన్నికల్లో ఎలాంటి ప్రభావం చూపించలేదని ఏడీఆర్ ​తెలిపింది.

ఇదీ చూడండి:హిజ్బుల్​ చీఫ్​ సహా 18 మందిపై 'ఉగ్ర'ముద్ర