భళా రివన్​.. భారత్​ టు అమెరికా వయా 'సాట్​'

బాల్యం నుంచే శాస్త్రవేత్త కావాలని కలలు కన్నాడు బిహార్​కు చెందిన ఓ విద్యార్థి. తన కల సాకారం చేసుకునే దిశగా మొదటి అడుగు వేశాడు. అమెరికా సహా ఇతర దేశాల్లోని విశ్వవిద్యాలయాల్లో చేరడం కోసం నిర్వహించే సాట్​ పరీక్షలో మూడో ర్యాంకు సాధించి కాలిఫోర్నియా విశ్వవిద్యాలయంలో ఉచితంగా ఆస్ట్రో ఫిజిక్స్ చదివే అవకాశం పొందాడు.

ప్రతిభావంతులకు నిలయం భారత్​​.. అని మరోసారి నిరూపించాడు బిహార్​ కటిహార్​కు చెందిన రివన్ ​రాజ్​​. స్కొలాస్టిక్​ అసెస్మెంట్​ టెస్ట్​(సాట్​)లో ప్రపంచంలోనే మూడవ 3వ ర్యాంకు సాధించి సత్తా చాటాడు. 100 శాతం స్కాలర్​షిప్​తో అమెరికాలోని కాలిఫోర్నియా విశ్వవిద్యాలయంలో ఆస్ట్రో ఫిజిక్స్​ చదివే​ అవకాశం దక్కించుకున్నాడు.

ఉన్నత చదువులు చదువుకుని, పరిశోధన చేసేందుకు విదేశాలకు వెళ్తున్నా.. దాని ప్రతిఫలం మాత్రం భారత్​కే అంకితమని చెబుతున్నాడు రివన్​.

"ఈ 'సాట్​' పరీక్ష మూడంచెలుగా జరిగింది. మొదటి పరీక్షలో ప్రపంచవ్యాప్తంగా 20 లక్షల మంది పాల్గొన్నారు. ఆ తరువాత రెండో పరీక్షకు అర్హత సాధించాను. ఇక ఆఖరి పరీక్షకు భారత దేశం నుంచి 10మంది ఎంపికయ్యాం. ఆ తరువాత నాకు 100శాతం స్కాలర్​షిప్​ వచ్చినట్టు ఈ-మెయిల్​ పంపారు. సొతంగా విశ్వవిద్యాలయాన్ని ఎంపిక చేసుకునే అవకాశం ఉండటం వల్ల నేను యునివర్సిటీ ఆఫ్​ కాలిఫోర్నియాను ఎంచుకున్నా. నేను చదువకోడానికి బయట దేశానికి వెళ్తున్నాను.. కానీ, నా ప్రాజెక్ట్​ నేను భారత్​ కోసమే చేస్తాను." - రివన్​ రాజ్.​

రివన్​​ నాలుగేళ్ల చదవుకు అయ్యే ఖర్చంతా అమెరికా ప్రభుత్వమే భరించనుంది. బాగా చదువుకుని దేశం పేరు నిలబెడతానని ధీమాగా చెబుతున్నాడు. తన విజయానికి తన తల్లిదండ్రులు, ఉపాధ్యాయులే కారణమని తెలిపాడు.

కలల సాకారానికి తొలి అడుగు..

ఇంటర్ ద్వితీయ సంవత్సరం చదువుతున్న రివన్​.. తొమ్మిదో తరగతి నుంచే శాస్త్రవేత్త అవ్వాలని కలలు కనేవాడు. ఎప్పుడూ చదువులో ముందుండే రివన్​కు బాల్యంలోనే​ ముంబయి ఐఐటీలో.. తన ప్రాజెక్ట్​ను ప్రదర్శించే అవకాశం వచ్చింది.

అప్పటి నుంచి వెనుదిరగని రివన్​.. ఇంధనం అవసరం లేకుండా నడిచే ఇంజిన్​ల​ను తయారు చేయాలని నిశ్చయించుకున్నాడు. తద్వారా కాలుష్యాన్ని తగ్గించడమే కాదు, ఇంధనం కోసం దేశాల మధ్య జరుగుతున్న ​యుద్ధాలకూ తెర వేయగలమని బలంగా నమ్ముతున్నాడు రివన్​.

తన ఆలోచనను వాస్తవరూపానికి తీసుకువచ్చేందుకు ఎంతో మందిని సంప్రదించాడు రివన్​. ప్రధానమంత్రి కార్యాలయం(పీఎంఓ)లోనూ ప్రయత్నించాడు. ​ తన ఆలోచనను ప్రశంసిస్తూ పీఎంఓ పంపిన లేఖ తనకెంతో స్ఫూర్తినిచ్చిందంటున్నాడు. తాజాగా సాట్​లో ప్రపంచంలోనే మూడవ 3వ ర్యాంకు సాధించి తల్లిదండ్రుల పేరు నిలబెట్టాడు.

సాట్​ అంటే?

అమెరికా సహా వివిధ దేశాల్లోని ప్రముఖ విశ్వవిద్యాలయాలు.. ప్రపంచంలోని కొందరు ప్రతిభావంతులకు ష్కాలర్​షిప్​లు ఇచ్చి తమ కళాశాలల్లో చేర్చుకుని ప్రోత్సహిస్తున్నాయి. స్కొలాస్టిక్​ అసెస్మెంట్​ టెస్ట్​(సాట్​)లో ఉత్తీర్ణులైన వారికి ఈ అవకాశం ఉంటుంది. అమెరికాలో కాలేజ్​ బోర్డ్​ అనే సంస్థ.. ఏటా 200 దేశాలకు ఒకేసారి ఈ సాట్​ పరీక్ష నిర్వహిస్తోంది.

ఇదీ చదవండి:బూడిద రంగులో కేరళ అడవులు.. కారణం సీతాకోకచిలుకలు!