ఎన్ఫోర్స్మెంట్ డైరెక్టరేట్ (ఈడీ)... కోల్కతాకు చెందిన శ్రీ గణేష్ జ్యువెలరీ హౌస్ (ఐ) లిమిటెడ్కు, దాని ప్రమోటర్లకు 'ఫెమా షోకాజ్ నోటీసు' జారీ చేసింది. ఇప్పటి వరకు ఈడీ జారీ చేసిన ఫెమా నోటీసుల్లో ఇదే అతిపెద్దది కావడం గమనార్హం.
"శ్రీ గణేష్ జ్యువెలరీ హౌస్ (ఐ) లిమిటెడ్, దాని ప్రమోటర్లు.. విదేశాల్లో రూ.7,220 కోట్ల మేర విదేశీ మారక ద్రవ్య అక్రమాలకు పాల్పడినట్లు గుర్తించాం. ఈ ఆభరణాల సంస్థ... ఉద్దేశపూర్వకంగా బ్యాంకు రుణం ఎగవేసినట్లు, అలాగే అక్రమ లావాదేవీలకు పాల్పడినట్లు కూడా దర్యాప్తులో తెలిసింది. అందుకే ఫారెన్ ఎక్స్ఛేంజ్ మేనేజ్మెంట్ యాక్ట్ (ఫెమా) కింద షోకాజ్ నోటీసు జారీ చేశాం."
- ఈడీ ప్రత్యేక దర్యాప్తు అధికారి
ఉద్దేశపూర్వక ఎగవేతదారు
రిజర్వ్ బ్యాంక్ ఆఫ్ ఇండియా (ఆర్బీఐ) ప్రకారం, దేశంలోని టాప్ 100 ఉద్దేశపూర్వక బ్యాంకు రుణం ఎగవేతదారుల్లో శ్రీ గణేష్ జ్యువెలరీ హౌస్ ఉంది. దాని ప్రమోటర్లు - నీలేశ్ పరేఖ్, ఉమేశ్ పరేఖ్, కమలేశ్ పరేఖ్ సోదరులపై ఈ మేరకు అభియోగాలు నమోదయ్యాయి. ఇప్పటికే ఈ కేసుపై కేంద్ర దర్యాప్తు సంస్థ (సీబీఐ), డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) దర్యాప్తు చేస్తున్నాయి.
ఈ బ్యాంకు ఫ్రాడ్ కేసులో నీలేశ్ పరేఖ్ను 2018లోనే డీఆర్ఐ అరెస్టు చేసింది.
అక్రమ నగదు చలామణి కేసు
ఈడీ 2018లోనే శ్రీ గణేష్ జ్యువెలరీ లిమిటెడ్, దాని ప్రమోటర్లపై అక్రమ నగదు చలామణి కేసు నమోదు చేసింది. నిందితులు... 20 ప్రభుత్వ బ్యాంకులు, 5 ప్రైవేటు బ్యాంకుల నుంచి వర్కింగ్ క్యాపిటెల్ లోన్స్ పేరిట రూ.2,672 కోట్ల రుణాలు తీసుకుని.. ఎగుమతి బిల్లులను డిస్కౌంట్ చేయడం ద్వారా మనీలాండరింగ్కు పాల్పడినట్లు అభియోగాలు మోపింది.
భారీగా బకాయిలు
శ్రీ గణేష్ జ్యువెలరీ హౌస్ (ఐ) లిమిటెడ్... అల్ మర్హాబా ట్రేడింగ్ ఎఫ్జెడ్సీ, స్పార్కెల్ జ్యువెలరీ ఎల్ఎల్సీ, యూఏఈ అండ్ ఆస్త జ్యువెలరీ ఎల్ఎల్సీలకు... భారీగా బిల్లులు బకాయి ఉన్నట్లు ఈడీ దర్యాప్తులో తేలింది. మొత్తంగా చూసుకుంటే నగల ఎగుమతి ద్వారా ఆదాయం వచ్చినా.. భారత్లోని బ్యాంకు కన్సార్టియానికి చెల్లించాల్సిన రుణాలు మాత్రం తిరిగి చెల్లించలేదని ఈడీ గుర్తించింది.
మొత్తంగా బ్యాంకుల, విదేశీ సంస్థల నుంచి తీసుకున్న సొమ్మును... శ్రీ గణేష్ జ్యువెలరీ హౌస్ (ఐ) లిమిటెడ్ విదేశాలకు తరలించినట్లు ఈడీ గుర్తించింది. ప్రస్తుతం ఈ సంస్థ ప్రమోటర్లకు వ్యతిరేకంగా ఈడీ రాసిన లేఖ స్విట్జర్లాండ్ ఫెడరల్ ఎన్ఫోర్స్మెంట్ ఏజెన్సీ వద్ద పెండింగ్లో ఉందని.. సంబంధిత వర్గాలు తెలిపాయి.
ఇదీ చూడండి:ఆంధ్రా బాటలో ఆ రాష్ట్రం- 75 శాతం ఉద్యోగాలు వారికే
