బెంగళూరు... గార్డెన్ సిటీగా ప్రాచుర్యం పొందింది. ప్రత్యేక థీమ్లతో ఏర్పాటు చేస్తున్న మొక్కలు, చెట్లతో నగరంలోని పార్కులు ఆకర్షణీయంగా తయారవుతున్నాయి. నగరవాసులను ఎంతో ఆకట్టుకుంటున్నాయి.
బటర్ఫ్లై పార్క్, రాక్ గార్డెన్, కారు పార్కులు ఈ కోవలోకి చెందినవే. వీటిలో నగరవాసులను ప్రస్తుతం అమితంగా ఆకట్టుకుంటున్నది కారుపార్కు. బెంగళూరులోని దేవరచిక్కనహళ్లిలో ఉందీ పార్కు.
కారు పార్కు ప్రత్యేకతలివే
దేశంలోని వివిధ ప్రాంతాల నుంచి తీసుకొచ్చిన పాతకాలపు కార్లను ప్రదర్శిస్తున్నారు ఈ కారుపార్కులో. అలాగే వివిధ జాతులకు చెందిన పక్షులు, ఇక్కడి ఓపెన్ఎయిర్ ఆడిటోరియం బెంగళూరు ప్రజలను అమితంగా ఆకట్టుకుంటున్నాయి.
వాహన భాగాలతో వెలుగుల వర్ణమాల
దేవరచిక్కనహళ్లిలోని కారుపార్కు సమీపంలో ఉన్న ఎలక్ట్రానిక్ సిటీ ఆర్టీవో ఫుట్పాత్... అందరినీ విశేషంగా ఆకర్షిస్తోంది. పాత లారీలు, బైకులు, కార్ల బేరింగులు, చైన్లు, ఎల్ఈడీ లైట్లతో రూపొందించిన కన్నడ వర్ణమాలను అక్కడ ప్రదర్శనకు ఉంచారు. ఎల్ఈడీ లైట్లతో కన్నడ అక్షరాలు వెలుగులను విరజిమ్ముతున్నాయి. వీటిని చూసిన కన్నడవాసులు... గర్వంగా ఉందని చెబుతున్నారు. ఈ విభిన్న ఆలోచన అందరికీ కన్నడ అక్షరమాలను పరిచయం చేసేలా ఉందని సంతోషం వ్యక్తం చేస్తున్నారు.