బాబ్రీ మసీదు కేసులో తుది తీర్పు కోసం మూడు నెలల గడువు పెంచింది సుప్రీంకోర్టు. ఆగస్టు 31లోగా తీర్పు చెప్పాలని లఖ్నవూలోని సీబీఐ కోర్టును ఆదేశించింది. ఈ కేసులో భాజపా సీనియర్ నేతలు లాల్ కృష్ణ అడ్వాణీ, ఉమా భారతి, మురళీ మనోహర్ జోషి నిందితులుగా ఉన్నారు.
ఇదీ నేపథ్యం..
1992 డిసెంబర్ 6న బాబ్రీ మసీదు ఘటన జరిగింది. ఈ కేసు విచారణ లఖ్నవూ కోర్టులో గత 30 ఏళ్లుగా కొనసాగుతోంది.
పలు సెక్షన్ల కింద కేసు నమోదు..
ఎఫ్ఐఆర్ నెంబర్ 197/92 క్రిమినల్ లా చట్టంలోని సెక్షన్ 7, ఐపీసీ సెక్షన్లు 395, 397, 332, 333, 338, 295, 297, 153ఏ కేసుల కింద గుర్తుతెలియని కరసేవకులపై కేసు నమోదైంది.
రెండో ఎఫ్ఐఆర్లో ఐపీసీ 153ఏ, 153బీ, 505సెక్షన్ల కింద ఎల్కే అడ్వాణీ, అశోక్ సింఘాల్, గిరిరాజ్ కిశోర్, మురళీ మనోహర్ జోషి, ఉమా భారతి, వినయ్ కటియార్, విష్ణు హరి దాల్మియా, సాధ్వీ రితంభరలపై కేసు నమోదు చేశారు.
బాబ్రీ ఘటనకు సంబంధించి 49 కేసులను నమోదు చేసింది సీబీఐ. 40మందిపై 1993, అక్టోబర్ 5న లఖ్నవూ లోని సీబీఐ ప్రత్యేక కోర్టులో ఉమ్మడి ఛార్జీషీటు దాఖలు చేసింది. ఇప్పటికే పలువురు నిందితులు మరణించారు.
ఇదీ చూడండి:సుప్రీం 'అయోధ్య' తీర్పులో ఎన్నో ప్రత్యేకతలు
