విదేశీ వ్యవహారాల శాఖలో కరోనా కలకలం!

విదేశీ వ్యవహారాల మంత్రిత్వ శాఖ(ఎంఈఏ)లో కరోనా కేసులు కలకలం రేపుతున్నాయి. దిల్లీలోని ఎంఈఏ ప్రధాన కార్యాలయంలో ఇద్దరు సిబ్బందికి కరోనా నిర్ధరణ అయినట్లు విశ్వసనీయ వర్గాలు వెల్లడించాయి. ఈ కారణంగా వారితో సన్నిహితంగా మెలిగిన ఇతర ఉద్యోగులంతా స్వీయ నిర్బంధంలో ఉండాలని ఎంఈఏ ఆదేశించినట్లు తెలుస్తోంది.

దిల్లీలోని విదేశీ వ్యవహారాల మంత్రిత్వ శాఖ(ఎంఈఏ) ప్రధాన కార్యాలయంలో పని చేస్తున్న ఉద్యోగుల్లో ఇద్దరికి కరోనా నిర్ధరణ అయింది. ఎంఈఏలోని న్యాయ విభాగంలో పని చేస్తోన్న ఒక ఉద్యోగి సహా సెంట్రల్ యూరప్ విభాగానికి చెందిన కన్సల్టెంట్​కు ఈ వారం ప్రారంభంలో కొవిడ్ నిర్ధరణ అయినట్లు సమాచారం. ఈ నేపథ్యంలో సెంట్రల్ యూరప్ విభాగంలోని దాదాపు మొత్తం సిబ్బంది, న్యాయ విభాగంలోని పెద్ద సంఖ్యలో ఉద్యోగులను 14 రోజుల స్వీయ నిర్బంధంలోకి పంపినట్లు తెలుస్తోంది.

మెడికల్ డైరెక్టర్​కూ కరోనా..

దిల్లీలో కరోనా చికిత్స అందిస్తున్న అతిపెద్ద ప్రభుత్వ ఆసుపత్రి ఎల్​ఎన్​జేపీ హాస్పిటల్​.. మెడికల్ డైరెక్టర్​ సురేశ్​ కుమార్​కూ కరోనా సోకినట్లు అధికారులు వెల్లడించారు. అదే ఆస్పత్రిలో మరో ఇద్దరు సిబ్బందికీ కొవిడ్​ నిర్ధరణ అయినట్లు శనివారం పేర్కొన్నారు. మే 17నే మెడికల్ డైరెక్టర్​గా సురేశ్​ కుమార్ బాధ్యతలు స్వీకరించారు.

ఇదీ చూడండి:సాయం అందించబోతే.. తల తెగిపోయింది!