'కరోనా అయితే నాకేంటి? నా దగ్గరకు అది రాలేదు'

ప్రపంచాన్ని గడగడలాడిస్తోన్న కరోనా మహమ్మారి తన దరికి చేరదని అసోంలోని ఓ రైతు నొక్కి చెబుతున్నాడు. 12 ఏళ్లుగా తన జీవన విధానమే ఇందుకు కారణమని అంటున్నాడు. మరి అతని కథేంటో మనమూ తెలుసుకుందామా?

ఖండాంతరాలు దాటి విస్తరించిన కరోనా మహమ్మారికి ప్రపంచమంతా వణికిపోతోంది. ఎవరి నుంచి వైరస్ వ్యాపిస్తుందోనన్న భయం ప్రతి ఒక్కరిలోనూ ఉంది. అసోంకు చెందిన ఓ రైతు మాత్రం తనకు కరోనా సోకదని నొక్కి వక్కాణిస్తున్నాడు.

మందు లేని ఈ మహమ్మారిని ఎదుర్కొనేందుకు ప్రస్తుతం ఉన్న ఆయుధం భౌతిక దూరం. ప్రపంచమంతా ఇదే పాటిస్తోంది. కానీ భూటాన్​ సరిహద్దులోని బాక్సా జిల్లాలో విజయ్​ బ్రహ్మ అనే రైతు.. 12 ఏళ్లుగా భౌతికంగానే కాదు, సామాజిక దూరాన్ని కూడా పాటిస్తూ.. తన పొలంలోని ఓ చెట్టుపైనే నివసిస్తున్నాడు.

12ఏళ్లుగా..

12ఏళ్ల క్రితం భార్యతో విడిపోయిన తర్వాత.. బ్రహ్మ ఏకాంత జీవితం గడపాలని నిశ్చయించుకున్నాడు. అనంతరం తన పొలంలోని ఓ చెట్టుపై నివాసం ఏర్పాటు చేసుకుని నివసిస్తున్నాడు. అప్పటినుంచి విజయ్ ఎవరితో కలవడు. మాట్లాడడు. తన పని తాను చేసుకుంటాడు.

"నాకు కరోనా వైరస్ గురించి ఈ మధ్యనే తెలిసింది. అయినప్పటికీ ఆ వైరస్ నాకు సోకదు. నేను ఎప్పుడు ఎక్కువ మంది ఉండే ప్రదేశాలకు వెళ్లను. నేను ఇక్కడ 12 ఏళ్లుగా ఉంటున్నాను. కూరగాయలు పండిస్తూ, పశువులను పెంచుతూ జీవనాన్ని సాగిస్తున్నా. అప్పుడప్పుడు చేపలను పట్టి మార్కెట్​లో అమ్ముతాను."

-విజయ్ బ్రహ్మ, రైతు

అక్కడ సాధారణమే..

అసోంలో చెట్లపై నివాసం సాధారణమే. ముఖ్యంగా భూటాన్ సరిహద్దుల్లో ఇటువంటి నిర్మాణాలు ఎక్కువగా కనిపిస్తాయి. రాత్రివేళల్లో పొలాల్లోకి ఏనుగులు రాకుండా పెద్ద పెద్ద శబ్దాలు చేసేందుకు ఈ ఏర్పాట్లు చేసుకుంటారు అక్కడి ప్రజలు.

ఇదీ చూడండి:'అనుమానాల్లేవ్... కరోనాపై విజయం తథ్యం'