ఆర్మీ డే: పరేడ్​కు తొలిసారి మహిళా అధికారి నాయకత్వం

దిల్లీలోని కరియప్ప మైదానంలో ఆర్మీ దినోత్సం జరిగింది. ఈ సందర్భంగా సైనిక శక్తిని, అత్యాధునిక ఆయుధ సంపత్తిని ప్రదర్శించింది సైన్యం. సైనికుల పరేడ్​కు తొలిసారి ఓ మహిళా అధికారి సారథ్యం వహించారు. సైనికుల శౌర్యాన్ని ప్రశంసిస్తూ ప్రధాని నరేంద్ర మోదీ ట్విట్టర్​ వేదికగా అభినందనలు తెలిపారు.

ఆర్మీ దినోత్సవం సందర్భంగా దిల్లీలో సైనిక శక్తిని, అత్యాధునిక ఆయుధ సంపత్తిని ప్రదర్శించింది భారత సైన్యం. ఈ కార్యక్రమంలో సైన్యాధిపతి​ ఎంఎం నరవాణే, ఎయిర్​ చీఫ్​ మార్షల్​ ఆర్​కేఎస్​ బదౌరియా, నేవీ చీఫ్​ కరంబీర్​ సింగ్​, సీడీఎస్​ జనరల్​ బిపిన్​ రావత్​ పాల్గొన్నారు. కరియప్ప మైదానంలో జరిగిన ఈ వేడుకలో పరేడ్​కు నాయకత్వం వహించిన తొలి మహిళా అధికారిగా ఆర్మీ కెప్టెన్​ తానియా షెర్గిల్​ గుర్తింపు పొందారు. పరేడ్​ అనంతరం జవాన్లకు పథకాలు ప్రదానం చేశారు నరవాణే.

ఆర్మీ దినోత్సవాన్ని ఏటా జనవరి 15న నిర్వహిస్తారు. అప్పటి లెఫ్టినెంట్​ జనరల్​ కేఎం కరియప్ప 1949లో భారత సైన్యానికి కమాండర్​ ఇన్​ చీఫ్​గా బాధ్యతలు స్వీకరించిందుకు ప్రతీకగా ఈ కార్యక్రమాన్ని జరుపుతారు.

సైన్యంపై మోదీ ప్రశంసలు

ఆర్మీ దినోత్సవం సందర్భంగా సైనికులకు అభినందనలు తెలిపారు ప్రధాని నరేంద్ర మోదీ. ఇటీవల కశ్మీర్​ లోయలో భారీ హిమపాతంలో ఓ గర్భిణీని అస్పత్రికి తీసుకెళ్లిన సైనిక సిబ్బంది శౌర్యాన్ని, వృత్తి నిబద్ధతను ప్రశంసిస్తూ ట్వీట్ చేశారు.

" శౌర్యానికి, వృత్తినిబద్ధతకు మారుపేరు మన ఆర్మీ . మానవతా విలువలకు గౌరవం. ఎవరికైనా సాయం కావాలంటే వెంటనే అక్కడ ఆర్మీ వాలిపోతుంది. అందరినీ కాపాడుతుంది. వారి కుటుంబ సభ్యులు ఎల్లప్పుడూ ఆరోగ్యంగా ఉండాలని ప్రార్థిస్తున్నాను."

-నరేంద్ర మోదీ ట్వీట్​.