రైల్వే బోర్డు ముఖ్య కార్యనిర్వాహక అధికారి (సీఈఓ)గా ప్రస్తుత ఛైర్మన్ వినోద్ కుమార్ యాదవ్ నియమకానికి ఆమోద ముద్ర వేసింది కేంద్ర మంత్రివర్గ నియామకాల కమిటీ. దీంతో రైల్వే చరిత్రలోనే మొట్టమొదటి సీఈఓగా నిలవనున్నారు వీకే యాదవ్.
రైల్వే బోర్డు పునర్వ్యవస్థీకరణకు బుధవారం ఆమోద ముద్ర వేసింది.. ప్రధానమంత్రి నరేంద్ర మోదీ నేతృత్వంలోని కేంద్ర మంత్రివర్గం. బోర్డు సభ్యులను 8 నుంచి ఐదుకు కుదించింది.
ఈ క్రమంలో యాదవ్ను బోర్డు సీఈఓగా నియమించింది నియామకాల కమిటీ. బోర్డు సభ్యులుగా.. ప్రదీప్కుమార్ (మౌలిక సదుపాయాలు), పీసీ శర్మ (ట్రాక్షన్, రోలింగ్ స్టాక్), పీఎస్ మిశ్రా (ఆపరేషన్స్, వాణిజ్యాభివృద్ధి), మంజూల రంగరాజన్ (ఆర్థికం)లను నియమించింది.
కంట్రోలింగ్ అధికారిగా..
బోర్డు పునర్నిర్మాణంలో భాగంగా.. స్టాఫ్, ఇంజినీరింగ్, మెటీరియల్ మేనేజ్మెంట్ సభ్యుల పోస్టులను తొలగించినట్లు తెలిపింది కమిటీ. మంత్రివర్గ నిర్ణయం మేరకు.. రోలింగ్ స్టాక్ సభ్యుడినే.. మానవ వనరులు (హెచ్ఆర్) డీజీగా నియమించినట్లు వెల్లడించింది. రైల్వే ప్రణాళిక ప్రకారం.. ఛైర్మన్, సీఈఓ.. హెచ్ఆర్ డీజీ సాయంతో మానవ వనరులకు బాధ్యత వహించే కేడర్ కంట్రోలింగ్ ఆఫీసర్గా విధలు నిర్వర్తించనున్నారు.
పేర్లలో మార్పులు..
ఇండియన్ రైల్వే మెడికల్ సర్వీసెస్ (ఐఆర్ఎంఎస్) పేరును.. ఇండియన్ రైల్వే హెల్త్ సర్వీసెస్గా, రైల్వేలోని 8 విభాగాలను కలిపి.. ఇండియన్ రైల్వే మేనేజ్మెంట్ సర్వీసెస్ (ఐఆర్ఎంఎస్)గా మార్చే ప్రక్రియ జరుగుతోంది.
ఇదీ చూడండి: సుదూరంలోని గెలాక్సీని కనుగొన్న భారత శాస్త్రవేత్తలు
