నిర్భయ: క్షమాభిక్ష పిటిషన్ దాఖలు చేసిన మరో దోషి

దేశవ్యాప్తంగా సంచలనం సృష్టించిన నిర్భయ కేసు మరో మలుపు తిరిగింది. దోషిగా తేలిన వినయ్ శర్మ దాఖలు చేసిన క్షమాభిక్ష పిటిషన్​ను ఇవాళ ఉదయం... రాష్ట్రపతి తిరస్కరించారు. అయితే.. మరో దోషి అక్షయ్​కుమార్ రాష్ట్రపతి వద్ద క్షమాభిక్ష పిటిషన్ దాఖలు చేశాడు. అదే సమయంలో.. నిర్భయ దోషులను ఉరి తీసేందుకు నూతన తేదీ ఖరారు చేయాలని తిహార్ జైలు అధికారులు దిల్లీ పటియాలా హౌస్​ కోర్టుకు విన్నవించారు.

నిర్భయ కేసులో ఉరి శిక్ష తప్పించుకునేందుకు తమకు ఉన్న అవకాశాలన్నింటినీ వినియోగించుకుంటున్నారు దోషులు. నిర్భయ దోషుల్లో ఒకరైన వినయ్​శర్మ క్షమాభిక్ష పిటిషన్​ను ఇవాళ ఉదయం... రాష్ట్రపతి తిరస్కరించారు. ఈ నేపథ్యంలో మరో దోషి అక్షయ్ కుమార్.. క్షమాభిక్ష పిటిషన్ దాఖలు చేశాడు. ఇదే సమయంలో.. దోషులను ఉరి తీసేందుకు నూతన తేదీ ఖరారు చేయాలని దిల్లీ పటియాలా హౌస్​ కోర్టును ఆశ్రయించారు తిహార్ జైలు అధికారులు.

"దోషిగా తేలిన వినయ్​శర్మ రాష్ట్రపతి వద్ద దాఖలు చేసిన క్షమాభిక్ష పిటిషన్ తిరస్కరణకు గురైన నేపథ్యంలో ఉరి తీసేందుకు నూతన తేదీ ఖరారు చేయాలని దిల్లీకోర్టును ఆశ్రయించాం."

-సందీప్ గోయల్, తిహార్ జైలు డీజీ

మరోమారు వాయిదా..

నిర్భయ కేసు దోషులను ఈ ఉదయం 6 గంటలకు ఉరి తీయాల్సి ఉంది. అయితే... డెత్​వారెంట్లపై దిల్లీ కోర్టు శుక్రవారం సాయంత్రం స్టే ఇచ్చింది. తదుపరి ఆదేశాలు ఇచ్చేవరకు ఈ నిలుపుదల అమల్లో ఉంటుందని స్పష్టం చేసింది. శిక్ష నుంచి తప్పించుకునేందుకు తమకు ఇంకా న్యాయపరమైన అవకాశాలు మిగిలే ఉన్నాయని, అవన్నీ పూర్తయ్యే వరకు ఉరిని వాయిదా వేయాలని దోషులు దాఖలు చేసిన పిటిషన్​ను విచారించిన న్యాయస్థానం ఈ మేరకు తీర్పు వెలువరించింది.

ఇదీ చూడండి: సీతమ్మ రికార్డు: ఏకధాటిగా 160 నిమిషాల ప్రసంగం