బంగాల్​లో 'పౌర' ఆందోళనలు తీవ్రం.. ఈశాన్యాన తగ్గుముఖం

పౌరసత్వ సవరణ చట్టానికి వ్యతిరేకంగా దేశవ్యాప్తంగా ఉద్రిక్త పరిస్థితులు నెలకొన్నాయి. బంగాల్​లో ఎక్కడికక్కడ నిరసనకారులు కేంద్ర ప్రభుత్వానికి వ్యతిరేకంగా నినాదాలు చేస్తున్నారు. దిల్లీ అట్టుడుకుతోంది. ఈశాన్య రాష్ట్రాల్లో కాస్త పరిస్థితులు అదుపులోనే ఉన్నాయి. అసోంలో శాంతియుతంగా నిరసనలు చేపడుతున్నారు.

కేంద్ర ప్రభుత్వం తీసుకొచ్చిన పౌరసత్వ చట్టానికి వ్యతిరేకంగా ఆందోళనలు కొనసాగుతూనే ఉన్నాయి. నిరసనల సెగ పలు రాష్ట్రాలకు పాకింది. బంగాల్​లో వరుసగా నాలుగో రోజూ ఆందోళనలు చెలరేగాయి. రాష్ట్రవ్యాప్తంగా జాతీయ రహదారుల్ని దిగ్బంధించిన నిరసనకారులు.. రైల్​ రోకోలతో కదం తొక్కుతున్నారు. దిల్లీ విశ్వవిద్యాలయ విద్యార్థులపై పోలీసులు దాడి చేశారన్న నివేదికలతో.. ఈ ఆందోళనలు మరింత ఉద్రిక్తంగా మారాయి.

రోడ్లపై టైర్లను తగులబెట్టారు. ఆందోళనకారుల దాడిలో కొందరు పోలీసులకు గాయాలయ్యాయి. నదియా, బిర్భుమ్​ జిల్లాల్లోనూ పౌరచట్టానికి వ్యతిరేకంగా హింస చెలరేగినట్లు సమాచారం.

నిరసనలు ఎక్కువగా ఉన్న మాల్దా, ఉత్తర్​ దినాజ్​పుర్​, ముర్షిదాబాద్​, హౌరా, ఉత్తర, దక్షిణ 24 పరగణాల జిల్లాల్లో అంతర్జాల సేవలపై నిషేధం కొనసాగుతోంది. తూర్పు మిద్నాపుర్​, ముర్షిదాబాద్​లలో తెల్లవారుజాము నుంచే రైళ్ల రాకపోకలను అడ్డుకున్నారు.

మమతా మెగా ర్యాలీ...

పశ్చిమ్​ బంగ ముఖ్యమంత్రి మమతా బెనర్జీ.. పౌరసత్వ చట్టానికి వ్యతిరేకంగా ఆందోళన బాట పట్టారు. కోల్​కతాలో వేలాది మంది పార్టీ కార్యకర్తలు, నేతలతో కలిసి మెగా ర్యాలీగా పాదయాత్రచేపట్టారు. కోల్​కతా రెడ్​ రోడ్డు నుంచి.. నోబెల్​ పురస్కార గ్రహీత రవీంద్రనాథ్​ ఠాగూర్​ నివాసం వరకు నడిచారు. ఎన్​ఆర్​సీతో పాటు.. పౌరసత్వచట్టాన్ని రాష్ట్రంలో అనుమతించబోమంటూ పార్టీ కార్యకర్తలతో ప్రమాణం చేయించారు.

''నేను బతికున్నంతవరకు పౌరసత్వ చట్టం, ఎన్​ఆర్​సీని రాష్ట్రంలో అమలు చేయను. మీరెన్ని ప్రయత్నాలు చేసినా.. నేను ఈ రాజ్యాంగ విరుద్ధ చట్టాన్ని అనుమతించబోను. ఈ చట్టాన్ని రద్దు చేసేంతవరకు నేను ప్రజాస్వామ్యయుతంగా నా నిరసనను కొనసాగిస్తాను.''

- మమతా బెనర్జీ, బంగాల్​ ముఖ్యమంత్రి

దిల్లీ జామియా మిలియా ఇస్లామియా విశ్వవిద్యాలయ విద్యార్థులపై పోలీసుల దాడిని కూడా మమతా బెనర్జీ తీవ్రంగా ఖండించారు.

మమత చేపట్టిన ర్యాలీపై బంగాల్‌ గవర్నర్‌ జగదీప్‌ ధంఖర్‌ విమర్శలు గుప్పించారు. రాజ్యాంగ పదవిలో ఉన్న ముఖ్యమంత్రి ఇలా వ్యవహరించడం సరికాదని ట్వీట్ చేశారు. మమత చర్యలు రాష్ట్రంలో హింసాత్మక ఘటనలను..మరింత ప్రేరేపించేవిగా ఉన్నాయని ఆరోపించారు.

ప్రభుత్వానికి కలకత్తా హైకోర్టు ఆదేశాలు...

పౌరసత్వ చట్టానికి వ్యతిరేకంగా రాష్ట్రంలో హింసాత్మక ఆందోళనలు జరుగుతున్న నేపథ్యంలో.. ప్రభుత్వానికి నోటీసులు జారీ చేసింది కోల్​కతా హైకోర్టు. రాష్ట్రంలో శాంతి భద్రతల్ని కాపాడేందుకు ఎలాంటి చర్యలు తీసుకున్నారో డిసెంబర్​ 18లోగా నివేదిక సమర్పించాలని ఆదేశించింది. హౌరా నివాసి దాఖలు చేసిన పిటిషన్​ను పరిశీలించిన న్యాయస్థానం ఈ నిర్ణయం తీసుకుంది.

అసోంలో అదుపులోనే...

అసోంలో పరిస్థితులు కాస్త మెరుగయ్యాయి. ఉదయం 6 నుంచి రాత్రి 9 గంటల వరకు కర్ఫ్యూ సడలించిన కారణంగా.. జనజీవనం సాధారణంగా ఉంది. అయితే.. గువాహటి, ఇతర ప్రాంతాల్లో శాంతియుత నిరసనలు కొనసాగుతున్నాయి.

ఆసు నేతల అరెస్టు...

పౌరచట్టానికి వ్యతిరేకంగా ర్యాలీ చేపట్టిన అఖిల భారత విద్యార్థి సమాఖ్య(ఆసు) ముఖ్య సలహాదారు సముజ్జల్​ భట్టాచార్య, ప్రధాన కార్యదర్శి గొగొయి సహా వందమందికిపైగా నిరసనకారుల్ని పోలీసులు అదుపులోకి తీసుకున్నారు. సత్యాగ్రహ పేరుతో 3 రోజుల నిరసన ప్రదర్శనను ప్రారంభించగా.. అరెస్టు చేసిన పోలీసులు అనంతరం విడుదల చేశారు.