'నేను ఠాగూర్​ కుర్చీలో కూర్చోలేదు- ఇదిగో సాక్ష్యం'

తాను శాంతినికేతన్​లోని ఠాగూర్​ కుర్చీలో కూర్చున్నారన్న కాంగ్రెస్​ ఎంపీ అధిర్​ రంజన్​ చౌదరి ఆరోపణలను ఖండించారు కేంద్ర మంత్రి అమిత్​ షా. పర్యటకుల కోసం కేటాయించిన విండో సీట్​లో కూర్చున్నానని వివరణ ఇచ్చారు.

కాంగ్రెస్​ ఎంపీ అధిర్​ రంజన్​ చౌదరి.. లోక్​సభలో సోమవారం చేసిన ఆరోపణలపై స్పందించారు కేంద్ర హోం మంత్రి అమిత్​ షా. అధిర్​ వ్యాఖ్యలను ఖండించారు. తాను రవీంద్రనాథ్​ ఠాగూర్​ కుర్చీలో కూర్చోలేదని వివరణ ఇచ్చారు. ఎక్కడ కూర్చున్నానో తెలుసుకునేందుకు విశ్వభారతి వైస్​ ఛాన్స్​లర్​ను అడిగానని.. తప్పేదీ జరగలేదని ఆయన చెప్పినట్లు సభలో వివరించారు.

''నేను ఎక్కడ కూర్చున్నానో తెలుసుకునేందుకు విశ్వభారతి వైస్​ ఛాన్స్​లర్​ను ​ఓ నివేదిక కోరాను. నేను కూర్చున్న స్థానంలో ఎవరైనా కూర్చునే అవకాశం ఉంటుందని ఆయన నాకు చెప్పారు. ఆ ఫొటోలు, వీడియోలు చూసి చెప్పండి. నేను ఠాగూర్​ సీట్లో కూర్చున్నానో.. లేదో?. ''

- అమిత్​ షా, కేంద్ర హోం మంత్రి

భారత మాజీ రాష్ట్రపతి ప్రణబ్​ ముఖర్జీ, మాజీ ప్రధాని రాజీవ్​ గాంధీ కూర్చున్న స్థానంలోనే తానూ కూర్చున్నట్లు పేర్కొన్నారు. పర్యటకులకూ అక్కడ కూర్చొనే అవకాశం ఉంటుందని చెప్పారు.

సభలో మాట్లాడేటప్పుడు వాస్తవాలను తెలుసుకోవాలని సభ్యులకు స్పష్టం చేశారు. తనపై తప్పుడు ఆరోపణలు చేయడానికి... ఆ వ్యక్తి(అధిర్​) పార్టీ నేపథ్యమే కారణమని ఆరోపించారు.

వాళ్లే కూర్చున్నారు..

అయితే.. రవీంద్రనాథ్​ ఠాగూర్​ కుర్చీలో మాజీ ప్రధాని జవహర్​లాల్​ నెహ్రూ కూర్చున్నారని ఫొటోలను సభలో చూపించారు అమిత్​ షా. మరో ఫొటోలో ఠాగూర్​ సోఫాలో టీ తాగుతున్న మాజీ ప్రధాని రాజీవ్​ గాంధీని చూపించారు.

భాజపా అధ్యక్షుడు జేపీ నడ్డాపైనా.. అధిర్​ చేసిన ఆరోపణలను తిప్పికొట్టారు షా. ఆయన సభలో సభ్యుడు కానందున నడ్డా పేరు ప్రస్తావించకూడదని స్పష్టం చేశారు.

బంగాల్​ పర్యటన సందర్బంగా.. శాంతినికేతన్​లోని విశ్వకవి రవీంద్రనాథ్​ ఠాగూర్​ కుర్చీలో కేంద్ర మంత్రి అమిత్​ షా కూర్చున్నారని లోక్​సభలో సోమవారం ఆరోపించారు కాంగ్రెస్​ ఎంపీ అధిర్​ రంజన్​ చౌధరి. దీనిపై దుమారం రేగింది.