గిరిరాజ్​ను మందలించిన హోంమంత్రి అమిత్​ షా

ఎన్డీఏ నేతల ఇఫ్తార్​ విందుపై కేంద్రమంత్రి గిరిరాజ్​ సింగ్ వ్యాఖ్యలను తప్పుబట్టారు హోం మంత్రి అమిత్​ షా. వివాదస్పద వ్యాఖ్యలకు దూరంగా ఉండాలంటూ ఆయనను మందలించారు.

ఎన్డీఏ నేతల ఇఫ్తార్ విందులపై కేంద్రమంత్రి గిరిరాజ్​ సింగ్ ట్విట్టర్​లో చేసిన వ్యాఖ్యలపై భాజపా అధ్యక్షుడు అమిత్​షా ఆగ్రహించారు. వివాదస్పద వ్యాఖ్యలకు దూరంగా ఉండాలని మందలించారు. ఎన్డీఏ నేతలు నితీశ్ కుమార్, రామ్ విలాస్ పాసవాన్ ఇఫ్తార్ విందులో పాల్గొంటున్న చిత్రాలను ట్విట్టర్​లో పోస్ట్​ చేశారు గిరిరాజ్.

గిరిరాజ్ ట్వీట్

'ఇంతే ఆసక్తితో నవరాత్రి ఉత్సవాల్లో ఫలహారం స్వీకరిస్తే ఎంత చక్కటి చిత్రాలు వస్తాయి... మన ధర్మాలను పాటించేందుకు విముఖత వ్యక్తం చేసి, ఇతరులకు కనిపించటానికి ఎందుకు ముందుంటాం' అని తన ట్వీట్​లో ప్రశ్నించారు.

బిహార్​లో నితీశ్​కుమార్​ ప్రభుత్వంలో పనిచేసినప్పటి నుంచి ఆయనను వ్యతిరేకిస్తూ వస్తున్నారు గిరిరాజ్. తాను పోస్ట్ చేసిన నాలుగు ఫోటోల్లోనూ నితీశ్​ ఉండటం చర్చనీయాంశంగా మారింది. గిరిరాజ్​ పోస్ట్ చేసిన చిత్రాల్లో భాజపా నేత, బిహార్ ఉపముఖ్యమంత్రి సుశీల్​ మోదీ సైతం కనిపిస్తున్నారు.

ట్విట్టర్​లో గిరిరాజ్ పోస్ట్ చేసిన ఓ చిత్రం

గిరిరాజ్ ట్వీట్​కు ఎల్​జేపీ నేత చిరాగ్ పాసవాన్ స్పందించారు. భారతీయ సంప్రదాయాలను గిరిరాజ్ ప్రశ్నిస్తున్నారని వ్యాఖ్యానించారు.

"సబ్​కా సాథ్, సబ్​కా వికాస్, సబ్​కా విశ్వాస్ "మోదీ నినాదమని చిరాగ్ గుర్తు చేశారు.

నితీశ్​కుమార్ కేంద్ర ప్రభుత్వ మంత్రివర్గంలో భాజపా ఇవ్వజూపిన ఒక మంత్రి పదవిని తిరస్కరించారు. బిహార్ తాజా మంత్రివర్గ విస్తరణలో ఎనిమిది మందికి మంత్రి పదవులు దక్కాయి. భాజపాకు నితీశ్ మంత్రివర్గంలో చోటుదక్కలేదు.

ఈ పరిణామాలు కొనసాగుతుండగానే గిరిరాజ్ రెండు పార్టీల మధ్య దూరం పెంచే వ్యాఖ్యలు చేశారు. ఈ నేపథ్యంలోనే దిద్దుబాటు చర్యలకు దిగారు అమిత్​షా.