భారత్​ దూకుడు- చైనా సరిహద్దులో రోడ్డు నిర్మాణం

తూర్పు లద్దాఖ్​లో చైనాతో వివాదం ఇంకా కొలిక్కి రానప్పటికీ 255కి.మీ వ్యూహాత్మక డీఎస్​డీబీఓ రోడ్డు నిర్మాణ పనులను కొనసాగించాలని భావిస్తోంది భారత్​. 8 వంతెనలున్న ఈ మార్గాన్ని ఈ ఏడాది చివరి నాటికి పూర్తి చేసే యోచనలో ఉంది.

భారత్-చైనా సరిహద్దు వివాదానికి ఇంకా పూర్తిస్థాయిలో తెరపడనప్పటికీ 255కి.మీ మేర ఉన్న వ్యూహాత్మక డీఎస్​డీ​బీఓ రోడ్డు నిర్మాణాన్ని ఈ ఏడాది చివరి నాటికి పూర్తి చేయాలని భావిస్తోంది కేంద్రం. ఇందుకు సంబంధించి ఇప్పటికే ఏర్పాట్లు పూర్తి కావచ్చినట్లు అధికారిక వర్గాలు తెలిపాయి. పర్వత ప్రాంతంలో నిర్మించబోయే దర్బుక్-శ్యోక్-దౌలత్ బేక్​ ఓల్డీ రోడ్డు కోసం ప్రత్యేకంగా ఝార్ఖండ్​ నుంచి కూలీలను లద్దాఖ్ తీసుకొచ్చినట్లు పేర్కొన్నాయి. వీరికి వైద్య పరీక్షలు నిర్వహించినట్లు స్పష్టం చేశాయి.

ఈ వ్యూహాత్మక రోడ్డు ద్వారా లేహ్ నుంచి దౌలత్​ బేగ్ ఓల్డీకి చేరుకునేందుకు భద్రతా దళాలకు ఆరు గంటలు మాత్రమే పడుతోంది. గతంలో చాలా ఎక్కువ సమయం పట్టేది. తూర్పు లద్దాఖ్​లో ఈ రోడ్డు నిర్మాణానికి ఇరుకైన ప్రదేశంలో పనిచేయాల్సి ఉంటుంది. చలి తీవ్రత ఎక్కువగా ఉండే కారణంగా అక్కడ నాలుగైదు నెలలు మాత్రమే నిర్మాణం చేపట్టవచ్చు. ఈ వాతావరణ పరిస్థితులను తట్టుకోగల ఝార్ఖండ్​ కూలీలను ఇప్పటికే అక్కడికి పంపినట్లు అధికారిక వర్గాలు తెలిపాయి.

రెండు దశాబ్దాల నుంచి

ఈ రోడ్డు నిర్మాణం తలపెట్టి రెండు దశాబ్దాలపైనే కావస్తోంది. 2014లో మోదీ ప్రభుత్వం అధికారంలోకి వచ్చాక దీనిపై ప్రత్యేక దృష్టి సారించింది. ఈ రోడ్డును అనుకున్న సమయంలో పూర్తి చేసేందుకు సంబంధిత అధికారులు సమన్వయంతో పని చేస్తున్నారు.

గాల్వన్ ప్రాంతంలోని పెట్రోలింగ్​ పాయింట్​ 14, శ్యోక్ నదీ ప్రాంతాన్ని కలిపే వంతెన నిర్మాణానికి ఈ వ్యూహాత్మక రోడ్డుతోనే సంబంధముంది.

తూర్పు లద్దాఖ్​లోని వాస్తవాధీన రేఖ వెంబడి చైనా భారీగా బలగాలను మోహరించిన అనంతరం సరిహద్దులో ఉద్రిక్త పరిస్థితులు నెలకొన్నాయి. చైనాకు దీటుగా భారత్​ కూడా బలగాలను మోహరించింది. వివాదాన్ని పరిష్కరించేందుకు ఇరు దేశాలు దౌత్య, సైనిక స్థాయి చర్చలు జరుపుతున్నాయి.