పాకిస్థాన్ సరిహద్దు కేంద్రంగా పని చేసే ఉగ్రమూకలను తరిమికొట్టేందుకు భారత్-అమెరికా కట్టుబడి ఉందని అగ్రరాజ్య అధ్యక్షుడు డొనాల్డ్ ట్రంప్ ఉద్ఘాటించారు. అందుకే తమ ప్రభుత్వం పాకిస్థాన్లోని ఉగ్రసంస్థలను అరికట్టడానికి కృషి చేస్తోందని స్పష్టం చేశారు.
అహ్మదాబాద్లోని మోటేరా స్టేడియం వేదికగా జరిగిన 'నమస్తే ట్రంప్' వేడుకలో పాల్గొన్న ట్రంప్... ఉగ్రవాదం నిర్మూలనలో భారత్ నాయకత్వ పాత్ర వహించాలని పిలుపునిచ్చారు.
"తమ సరిహద్దులను భద్రపరుచుకోవడం, నియంత్రించే హక్కు ప్రతి దేశానికి ఉంది. ఉగ్రవాదులను అడ్డుకుని, వారి సిద్ధాంతాలపై పోరాడటానికి అమెరికా-భారత్ కట్టుబడి ఉన్నాయి. ఇదే విషయమై.. నేను అధ్యక్ష పదవి చేపట్టినప్పటి నుంచి నా యంత్రాంగం.. పాకిస్థాన్తో చర్చలు జరుపుతోంది. పాక్తో కలిసి ఉగ్రవాద సంస్థలను అరికట్టి, పాక్ సరిహద్దు కేంద్రంగా పనిచేసే ఉగ్రమూకలను తరిమికొట్టే విధంగా మేము ముందడుగు వేస్తున్నాం. ఈ చర్యల వల్ల పాకిస్థాన్లో సానుకూల స్పందనలు కనపడుతున్నాయి. భవిష్యత్తులో దక్షిణాసియాలో ఉద్రిక్తతలు తగ్గి, శాంతి భద్రతలు మెరుగుపడతాయని ఆశిస్తున్నాం. సమస్యలు పరిష్కరించి శాంతిని నెలకొల్పాలని భారత్ ఎప్పుడూ అనుకుంటుంది. అందుకే ఈ విషయంలో భారత్ నాయకత్వ పాత్ర ఎంతో అవసరం."
--- డొనాల్డ్ ట్రంప్, అమెరికా అధ్యక్షుడు.
అంతకుముందు.. ఐసిస్ అధినేత బాగ్దాదీని అమెరికా మట్టుబెట్టిన ఘటనను వివరించారు ట్రంప్.
