''కోజికోడ్'​లో ఆ సమస్యలు ఎప్పుడో పరిష్కరించారు'

విమానయన నియంత్రణ సంస్థ డీజీసీఏ గుర్తించిన సమస్యలన్నింటినీ కోజికోడ్​ ఎయిర్​పోర్ట్ అధికారులు పరిష్కరించారని కేంద్ర మంత్రి హర్దీప్ సింగ్ పూరీ స్పష్టం చేశారు. ఏడాది క్రితమే కోజికోడ్ అధికారులకు డీజీసీఏ షోకాజ్ నోటీసులు జారీ చేసిన విషయంపై స్పందించారు. ఇలాంటి నోటీసులు సర్వసాధారణమేనని చెప్పారు.

డీజీసీఏ గతంలో గుర్తించిన అన్ని సమస్యలను కోజికోడ్ విమానాశ్రయ అధికారులు ఇప్పటికే పరిష్కరించారని పౌర విమానయాన శాఖ మంత్రి హర్దీప్​ సింగ్ పూరి వెల్లడించారు. రన్​వే సహా పలు భద్రతా లోపాలపై గతేడాదే కోజికోడ్​ ఎయిర్​పోర్ట్​ డైరెక్టర్​కు డీజీసీఏ షోకాజ్ నోటీసులు జారీ చేసిందని వార్తలు ప్రసారమైన నేపథ్యంలో మంత్రి స్పందించారు. ఇలాంటి సమస్యల గురించి నోటీసులు జారీ చేయడం సాధారణమేనని స్పష్టం చేశారు.

"సమస్యలను గుర్తించి ఎయిర్​పోర్ట్​ అధికారులకు తెలిజేయడం సాధారణమే. రబ్బర్ నిక్షేపాలు, నీరు నిలిచిపోవడం, పగుళ్లు వంటి సాధారణ సమస్యల గురించి కోజికోడ్ ఎయిర్​పోర్ట్ నిర్వహాకులకు డీజీసీఏ సమాచారం అందించింది. వాటిని అధికారులు పరిష్కరించారు."

-హర్దీప్ సింగ్ పూరి, పౌర విమానయాన శాఖ మంత్రి

ప్రమాద ఘటనపై ఎయిర్​క్రాఫ్ట్ యాక్ట్ ప్రకారం దర్యాప్తుకు ఆదేశించినట్లు తెలిపారు పూరి. విచారణలో వెలుగుచూసిన విషయాలను ప్రజల ముందు ఉంచుతామని స్పష్టం చేశారు. ఈ విషయంలో ఎలాంటి వదంతులు సృష్టించకుండా అందరూ సంయమనం పాటించాలని విజ్ఞప్తి చేశారు.

"ప్రమాదానికి గురైన విమాన డిజిటల్ ఫ్లైట్ డేటా రికార్డర్(డీఎఫ్​డీఆర్), కాక్​పిట్ వాయిస్ రికార్డర్(సీవీఆర్)ను స్వాధీనం చేసుకున్నాం. ఎయిర్​క్రాఫ్ట్ ప్రమాద దర్యాప్తు బృందం దీనిపై విచారణ చేపడుతోంది."

-హర్దీప్ సింగ్ పూరి, పౌర విమానయాన శాఖ మంత్రి

అప్పుడే నిర్ణయానికి రాలేం

అంతకుముందు ప్రమాదం జరిగిన ఎయిర్​పోర్ట్​ను సందర్శించారు హర్దీప్​ సింగ్ పూరి. ప్రస్తుత పరిస్థితి గురించి అధికారులతో ఆరా తీశారు. అనంతరం కోజికోడ్ బోధనాస్పత్రిని సందర్శి బాధితులను పరామర్శించారు.

కోజికోడ్‌ ఘటనను మంగళూరు ఘటనతో పోలుస్తూ అప్పుడే ఓ నిర్ణయానికి రాలేమని పూరి అన్నారు. ప్రమాదం జరిగిన ప్రాంతాన్ని పరిశీలించిన అనంతరం విలేకరుల సమావేశంలో మాట్లాడారు.

"లేబుల్‌ టాప్‌ చాలా ప్రాంతాల్లో ఉంది. దాని వల్ల కొన్ని సమస్యలు ఉన్నాయన్నది వాస్తవం. కానీ ఈ ఘటనను పదేళ్ల క్రితం జరిగిన మంగళూరు ఘటనతో పోలుస్తూ ఇప్పుడే ఓ నిర్ణయానికి రాలేము. దర్యాప్తు పూర్తయ్యే వరకు వేచిచూడాలి"

-హర్దీప్ సింగ్ పూరి, పౌర విమానయాన శాఖ మంత్రి

ఈ దుర్ఘటనపై కేంద్ర, రాష్ట్ర ప్రభుత్వాలు కలిసి పనిచేస్తున్నాయని మంత్రి అన్నారు. మృతుల కుటుంబాలకు రూ.10 లక్షల నష్ట పరిహారం అందించనున్నట్లు ఆయన ప్రకటించారు. క్షతగాత్రులకు మెరుగైన వైద్యం అందిస్తున్నట్లు ప్రకటించారు. ఈ ప్రమాదంలో మృతిచెందిన పైలట్ కెప్టెన్ దీపక్ సాథే, కో-పైలట్ అఖిలేష్ కుమార్‌లకు నివాళులర్పించారు. సాథే ఎంతో నైపుణ్యం గల పైలట్‌ అని కొనియాడారు.