కశ్మీర్​పై ఆల్​ఖైదా నాయకుడి తొలి వీడియో

కశ్మీర్​పై తొలిసారి ఓ వీడియో విడుదల చేసింది ఆల్​ఖైదా ఉగ్రవాద సంస్థ. భారత ఆర్థిక వ్యవస్థ క్షీణించి ఇబ్బందులు పడేలా నిరంతరం ఆ దేశ సైన్యం, ప్రభుత్వానికి సమస్యలు సృష్టించాలని ఉగ్రవాదులకు సూచించాడు ఆల్​ఖైదా నాయకుడు అయమాన్​ అల్​ జవాహరి.

ఆల్​ఖైదా ఉగ్రవాద సంస్థ నాయకుడు అయ్మన్​ అల్​ జవాహరి భారత్​లోని కశ్మీర్​పై తొలిసారి వీడియో విడుదల చేశాడు. భారత ఆర్థిక వ్యవస్థ క్షీణించి దేశం ఇబ్బందులు పడేలా ఆ దేశ సైన్యం, ప్రభుత్వానికి నిరంతరం సమస్యలు సృష్టించాలని ఉగ్రవాదులకు పిలుపునిచ్చాడు. ఒసామా బిన్​ లాడెన్​ మరణానంతరం ఆల్​ఖైదాకు నాయకత్వం వహిస్తున్నాడు జవాహరి.

" కశ్మీర్​లోని సాయుధ ఉగ్రవాదులు ప్రస్తుత పరిస్థితుల్లో భారత సైన్యం, ప్రభుత్వంపై అవిశ్రాంత సమస్యలు సృష్టించేందుకు ఒకే ఆలోచనతో ఉండాలి. భారత ఆర్థిక వ్యవస్థ క్షీణించి మానవ వనరులు, పరికరాలకు తీవ్ర నష్టం కల్గించి​ ఇబ్బందులు పడేలా చేయాలి. ప్రపంచ వ్యాప్తంగా ఉన్న ఉగ్రవాదులు సమాచారం పంచుకునేందుకు పటిష్ఠ ఛానళ్లను ఏర్పాటు చేయాలి. "

- అల్​ జవాహరి, ఆల్​ఖైదా నాయకుడు.

కశ్మీర్​పై ఆల్​ఖైదా విడుదల చేసిన తొలి వీడియోను 'అస్​-సహబ్​' ఛానల్​లో పోస్ట్​ చేశారు. ఈ వీడియోను భద్రత సంస్థలు పరిశీలించినట్లు అధికారులు తెలిపారు. కశ్మీర్​ లోయలో ఉన్న ఉగ్రవాదులను ఏకం చేసే ప్రయత్నంగా ఈ దృశ్య సందేశం పంపినట్లు అధికారులు అనుమానిస్తున్నారు.

వీడియోలో జవాహరి మాట్లాడుతున్న సమయంలో భారత బలగాల చేతిలో హతమైన ఉగ్రవాది జకిర్​ మూసా చిత్రం కనిపించింది. కానీ మూసా అంశాన్ని జవాహరి ప్రస్తావించలేదు. భారత్​లోని ఆల్​ఖైదా విభాగం ' అన్సర్​, ఘజ్వత్​ ఉల్​ హింద్​'కి మూసా నాయకత్వం వహించాడు.

ఇదీ చూడండి: విషవాయువు లీకై 46 మంది ఆస్పత్రిపాలు