'దిల్లీ కాలుష్యం'పై సుప్రీం గరం.. సీఎస్​లకు సమన్లు

రాజధాని నగరం దిల్లీ వాయుకాలుష్యంపై సుప్రీం కోర్టు ఆగ్రహం వ్యక్తం చేసింది. కాలుష్యాన్ని నియంత్రించేందుకు ఎలాంటి చర్యలు తీసుకుంటున్నారో వివరించాలని పంజాబ్​, హరియాణా, యూపీ, దిల్లీ సీఎస్​లకు సమన్లు జారీ చేసింది.

దిల్లీ వాయుకాలుష్యం రోజురోజుకూ మరింత తీవ్రతరమవుతోంది. గాలి నాణ్యత సూచీలు పడిపోతున్నాయి. ఈ నేపథ్యంలో దిల్లీ కాలుష్యంపై దాఖలైన పిటిషన్లపై విచారణ చేపట్టింది సుప్రీం కోర్టు. దిల్లీ-ఎన్​సీఆర్​ ప్రాంతంలో కాలుష్య నివారణకు ఎలాంటి చర్యలు చేపడుతున్నారో వివరణ ఇవ్వాలని పంజాబ్​, హరియాణా, దిల్లీ, యూపీ రాష్ట్ర ముఖ్య కార్యదర్శులకు సమన్లు జారీ చేసింది.

కాలుష్య నివారణకు సమర్థవంతమైన చర్యలు చేపట్టాలని, వాయుకాలుష్యం తీవ్రంగా ఉన్న 13 ప్రాంతాల్లో కాలుష్య కారకాలను తొలిగించేందుకు కృషి చేయాలని జస్టిస్​ అరుణ్​ మిశ్రా, జస్టిస్​ దీపక్​ గుప్తాతో కూడిన ధర్మాసనం స్పష్టం చేసింది.

మినహాయింపు ఎందుకు...?

దిల్లీ ప్రభుత్వం... సరి-బేసి విధానంలో భాగంగా ద్వి, త్రిచక్ర వాహనాలకు మినహాయింపు ఇవ్వడాన్ని సుప్రీం కోర్టు ప్రశ్నించింది. సరి-బేసి విధానం అమల్లో ఉన్నప్పటికీ కాలుష్యం పెరుగుతూనే ఉందని ఆగ్రహించింది. వ్యవసాయ వ్యర్థాల కాల్చివేత తగ్గినప్పటికీ... కాలుష్య స్థాయిలు దారుణంగా ఉండటంపై అత్యున్నత న్యాయస్థానం ఆందోళన వ్యక్తం చేసింది.

అయితే.. పొరుగు రాష్ట్రాల్లో పంట వ్యర్థాల దహనమే కాలుష్యానికి కారణమని.. సరి-బేసి విధానంతో కాలుష్యం కాస్త తగ్గుముఖం పట్టిందని న్యాయస్థానానికి తెలిపింది దిల్లీ ప్రభుత్వం.

పార్లమెంటరీ ప్యానెల్​ సమావేశానికి డుమ్మా...

దిల్లీ వాయుకాలుష్యంపై చర్చించేందుకు ఉద్దేశించిన కీలక పార్లమెంటరీ ప్యానెల్​ సమావేశానికి పర్యావరణ మంత్రిత్వ శాఖ ఉన్నతాధికారులు, దిల్లీ అభివృద్ధి ప్రాధికార సంస్థ(డీడీఏ), మునిసిపల్​ కమిషనర్లు గైర్హాజరైనట్లు తెలుస్తోంది. దీనిపై పట్టణాభివృద్ధి శాఖ పార్లమెంటరీ స్థాయీ సంఘం సభ్యులు అసంతృప్తి వ్యక్తం చేశారు.

కొన్ని వారాలుగా దిల్లీలో వాయుకాలుష్యం ప్రమాదఘంటికలు మోగిస్తోంది. వరుసగా నాలుగు రోజుల్లోనూ వాయునాణ్యత క్షీణించడం... విద్యాసంస్థల బంద్​కు దారి తీసింది.

ఇదీ చూడండి:ఈ బార్​లో బీర్​ ఉండదు.. ఆక్సిజన్​ మాత్రమే లభ్యం!