'10 ట్రిలియన్ డాలర్ల ఆర్థికవ్యవస్థే లక్ష్యం'

భారతదేశాన్ని 2030 నాటికి 10 ట్రిలియన్​ డాలర్ల ఆర్థిక వ్యవస్థగా తీర్చిదిద్దడమే ప్రభుత్వ లక్ష్యమని రక్షణమంత్రి రాజ్​నాథ్​ సింగ్ తెలిపారు. 2025 నాటికి భారత్​లో 26 బిలియన్ డాలర్ల విలువై రక్షణ పరిశ్రమను అభివృద్ధి చేస్తామని పేర్కొన్నారు. ఆయుధాలు దిగుమతి చేసుకునే స్థాయి నుంచి ఎగుమతి చేసే స్థాయి వరకు ఎదుగుతామని ఆయన ఆశాభావం వ్యక్తం చేశారు.

2030 నాటికి భారత్​ను 10 ట్రిలియన్ డాలర్ల ఆర్థిక వ్యవస్థగా తీర్చిదిద్దడమే ప్రభుత్వ లక్ష్యమని రక్షణమంత్రి రాజ్​నాథ్​సింగ్ పేర్కొన్నారు. ఇందుకు తోడ్పడే వాటిల్లో రక్షణ రంగం ఒకటని ఆయన అభిప్రాయపడ్డారు.

"ప్రస్తుతం దేశ ఆర్థిక వ్యవస్థ 2.7 ట్రిలియన్ డాలర్లుగా ఉంది. 2024 నాటికి 5 ట్రిలియన్​ డాలర్లు, 2030 నాటికి 10 ట్రిలియన్​గా మార్చడమే మా ప్రభుత్వ లక్ష్యం." -రాజ్​నాథ్​సింగ్​, రక్షణమంత్రి

'మేక్​ ఇన్​ ఇండియా: 2025 నాటికి 26 బిలియన్​ డాలర్ల రక్షణ పరిశ్రమ' ఇతివృత్తంతో సొసైటీ ఆఫ్ ఇండియన్ డిఫెన్స్ మాన్యుఫాక్చురర్స్​ (ఎస్​ఐడీఎమ్) వార్షిక సర్వసభ్య సమావేశం సందర్భంగా ఈ వ్యాఖ్యలు చేశారు రాజ్​నాథ్​.

ఎగుమతిదారుగా మారతాం

గతంలో అనేక కారణాల వల్ల భారత రక్షణ పరిశ్రమ తన పూర్తి సామర్థ్యాన్ని ప్రదర్శించలేదని రాజ్​నాథ్​ సింగ్ వ్యాఖ్యానించారు. ఫలితంగా భారత్​ దిగుమతి చేసుకున్న ఆయుధాలపై ఆధారపడాల్సి వచ్చిందని పేర్కొన్నారు.

మేక్​ ఇన్​ ఇండియాతో భారతదేశాన్ని ప్రపంచంలోనే ప్రధాన ఆయుధాల తయారీ కేంద్రంగా మారుస్తామని రాజ్​నాథ్ పేర్కొన్నారు. అంతేకాకుండా నికర రక్షణ ఎగుమతిదారుగా మార్చడానికి అనేక ముఖ్యమైన చర్యలు తీసుకుంటున్నట్లు స్పష్టం చేశారు.

ఈ లక్ష్యాన్ని సాధించేందుకు పారిశ్రామిక లైసెన్సింగ్​ ప్రక్రియను సరళీకృతం చేస్తామని, విదేశీ ప్రత్యక్ష పెట్టుబడుల క్యాప్​ను పెంచుతామని, డిఫెన్స్ ఆఫ్​సెట్ విధానాన్ని క్రమబద్ధీకరిస్తామని రాజ్​నాథ్ తెలిపారు.

20 నుంచి 30 లక్షల​ ఉద్యోగాలు

అదనంగా 10 బిలియన్ డాలర్ల పెట్టుబడి పెట్టి, రక్షణశాఖలో సుమారుగా 20 నుంచి 30 లక్షల​ ఉద్యోగాలు సృష్టిస్తామని రాజ్​నాథ్ తెలిపారు.

ఇదీ చూడండి: 'గేట్స్​' పురస్కారంతో మోదీకి సత్కారం- కారణమిదే