కరోనా టీకా అభివృద్ధిలో 30 బృందాలు

దేశవ్యాప్తంగా దాదాపు 30 బృందాలు కరోనా వ్యాక్సిన్ తయారీలో నిమగ్నమైనట్లు అధికారులు వెల్లడించారు. ఔషధాన్ని త్వరితగతిన అభివృద్ధి చేసే విధంగా హ్యాకథాన్ ప్రారంభించినట్లు తెలిపారు. దేశంలో శాస్త్రీయ రంగానికి బలమైన పునాది ఉందని పేర్కొన్నారు.

కరోనా వైరస్​ వ్యాక్సిన్ తయారీ కోసం ఆల్ ఇండియా కౌన్సిల్ ఫర్ టెక్నికల్ ఎడ్యూకేషన్ (ఏఐసీటీఈ), కౌన్సిల్ ఆఫ్ సైంటిఫిక్ అండ్ ఇండస్ట్రీయల్ రీసెర్చ్(సీఎస్​ఐఆర్) ఆధ్వర్యంలో హ్యాకథాన్​ ప్రారంభించినట్లు కేంద్ర ప్రభుత్వ ప్రధాన శాస్త్రీయ సలహాదారుడు (పీఎస్​ఏ) ప్రొఫెసర్ కే విజయ్ రాఘవన్ వెల్లడించారు.

హ్యాకథాన్​లో భాగంగా.. తక్కువ సమయంలో, తక్కువ వ్యయంతో ఔషధాన్ని అభివృద్ధి చేయడంపై విద్యార్థులకు శిక్షణ ఇవ్వనున్నట్లు తెలిపారు. భారత్​ వ్యాక్సిన్ తయారీ ప్రపంచస్థాయిలో ఉందని పేర్కొన్నారు.

వ్యాక్సిన్ ప్రయత్నాలు

భారత్​లోని దాదాపు 30 బృందాలు కరోనా వైరస్​కు టీకా కనుగొనే ప్రయత్నాల్లో ఉన్నాయని రాఘవన్​ వెల్లడించారు. భారీ పరిశ్రమల నుంచి వ్యక్తిగత పరిశోధకుల వరకు ఈ వ్యాక్సిన్ తయారీలో నిమగ్నమైనట్లు తెలిపారు. ఇందులో దాదాపు 20 బృందాలు వేగంగా ఫలితాలు రాబడుతున్నట్లు పేర్కొన్నారు.

వ్యాక్సిన్ తయారీకి 10 సంవత్సరాల సమయం పడుతుందని రాఘవన్ అంచనా వేశారు. కానీ, సంవత్సర కాలంలోనే టీకా కనుగొనడమే లక్ష్యంగా ప్రపంచ దేశాలు పనిచేస్తున్నాయన్నారు. కొత్త డ్రగ్స్​ తయారు చేయడం చాలా సవాల్​తో కూడుకున్న పనిగా వ్యాఖ్యానించారు.

"జనరిక్ మందులను అత్యధికంగా తయారు చేస్తున్న దేశాల్లో భారత్ ఒకటి. వ్యాక్సిన్ సంస్థలు ఔషధాల తయారీతో పాటు పరిశోధనాభివృద్ధిపైనా దృష్టి సారిస్తున్నాయి. పెద్ద పరిశ్రమలు, స్టార్టప్​లు, పరిశోధకులు సహా మొత్తం 30 బృందాలు కొవిడ్-19 వ్యాక్సిన్ అభివృద్ధిలో నిమగ్నమై ఉన్నాయి. ఇందులో 20 వరకు వేగంగా పనిచేస్తున్నాయి."

-ప్రొఫెసర్ కే విజయ్ రాఘవన్, కేంద్ర ప్రభుత్వానికి ప్రధాన శాస్త్రీయ సలహాదారుడు

టీకా తయారు చేసిన తర్వాత దాన్ని అందరికీ అందుబాటులోకి తీసుకురావడం కూడా సవాల్​తో కుడుకున్న పని అని రాఘవన్ పేర్కొన్నారు. వ్యాక్సిన్ అందుబాటులోకి వచ్చేవరకు ప్రజలందరూ తగిన జాగ్రత్తలు పాటించాలని సూచించారు.

బలమైన శాస్త్రీయ పునాది

కరోనాపై పోరాటంలో వ్యాక్సిన్, డ్రగ్​లతోనే విజయం సాధించవచ్చని నీతి ఆయోగ్ సభ్యుడు, కరోనా సాధికారిక కమిటీ ఛైర్మన్ వీకే పాల్ అభిప్రాయపడ్డారు. దేశంలోని శాస్త్ర-సాంకేతిక సంస్థలన్నీ కరోనాకు వ్యతిరేకంగా పోరాడుతున్నాయన్నారు.

"భారత ఫార్మా పరిశ్రమ ప్రపంచవ్యాప్తంగా పేరుగాంచింది. భారత్​లో తయారు చేసిన ఔషధాలను చాలా దేశాల్లో ఉపయోగిస్తున్నారు. దేశానికి ఇలాంటి బలమైన శాస్త్రీయ పునాది ఉండటం గర్వకారణం."

-వీకే పాల్, కరోనా సాధికారిక కమిటీ ఛైర్మన్

కరోనా వైరస్ నేపథ్యంలో వైద్య అత్యవసర సేవలను సమన్వయం చేయడానికి కేంద్ర ప్రభుత్వం సాధికారిక కమిటీ (ఎంపవర్డ్​ గ్రూప్​ 1)ను ఏర్పాటు చేసింది.

ఇదీ చదవండి:బాబ్రీ కేసు నిందితుల వాంగ్మూలం నమోదుకు ఆదేశం