డిగ్రీ మార్కుల ఆధారంగా ఎంబీఏ సీటు

డిగ్రీ మార్కుల ఆధారంగా ఎంబీఏ, పీజీడీఎం కోర్సుల్లో ప్రవేశాలు కల్పించేందుకు ఏఐసీటీఈ అనుమతించింది. కరోనా కారణంగా ప్రవేశ పరీక్షలు నిర్వహించలేని పరిస్థితి నెలకొన్నందున ఈ నిర్ణయం తీసుకుంది. ఈ ఒక్క సంవత్సరానికి ఈ నిబంధన వర్తిస్తుందని స్పష్టం చేసింది.

కొవిడ్ కారణంగా ప్రవేశ పరీక్షల నిర్వహణ వాయిదా పడింది. ఈ నేపథ్యంలో ఎంబీఏ, పీజీడీఎం కోర్సుల్లో విద్యార్థులను డిగ్రీ మార్కుల ఆధారంగా చేర్చుకునేందుకు విద్యాసంస్థలకు అనుమతిస్తున్నట్లు భారత సాంకేతిక విద్యా మండలి(ఏఐసీటీఈ) పేర్కొంది. 2020-21 విద్యా సంవత్సరానికే ఈ నిబంధన వర్తిస్తుందని స్పష్టం చేసింది.

"కరోనా వ్యాప్తి భయాలతో రాష్ట్రాల్లో ఎంబీఏ, పీజీడీఎం కోర్సులకు ప్రవేశ పరీక్షలు జరగడం లేదు. ఈ పరీక్షలు జరుగుతాయా లేదా అన్న అంశంపై స్పష్టత లేదు. కాబట్టి విద్యార్థులకు ప్రయోజనం కలిగే విధంగా ఓ ప్రత్యామ్నాయాన్ని ఏఐసీటీఈ అందుబాటులోకి తీసుకొచ్చింది. పీజీడీఎం, ఎంబీఏ కోర్సులు అందించే సంస్థలు విద్యార్థులను మార్కుల ఆధారంగా చేర్చుకునేందుకు అనుమతిస్తున్నాం."

-రాజీవ్ కుమార్, ఏఐసీటీఈ మెంబర్ సెక్రెటరీ

అయితే సీట్ల కేటాయింపులో ప్రవేశపరీక్షలు రాసిన విద్యార్థులకే(ఏదైనా రాష్ట్రంలో ఈ పరీక్షలు జరిగి ఉంటే) తొలి ప్రాధాన్యం ఇస్తామని రాజీవ్ స్పష్టం చేశారు. ఖాళీ సీట్లు ఉంటే డిగ్రీ మార్కుల ఆధారంగా విద్యార్థులను చేర్చుకోవచ్చని తెలిపారు. మార్కుల ద్వారా విద్యార్థులకు ప్రవేశాలు కల్పించడంలో పారదర్శకత పాటించాలని సూచించారు.