కమల్​-రజనీపై అన్నాడీఎంకే 'టామ్ అండ్​ జెర్రీ' పంచ్

'రాజకీయంగా కమల్​ హాసన్​, రజనీకాంత్​లు కలవడం పిల్లి-ఎలుక ఒకేతాటిపైకి వచ్చినట్లు ఉంటుంది' అని విమర్శించింది అన్నాడీఎంకే. రాజకీయాల్లో వారిరువురికీ వేర్వేరు సిద్ధాంతాలున్నాయని, అటువంటి వారు కలిస్తే ఇలాగే ఉంటుందని సొంత పత్రిక​ 'నమదు అమ్మ' వ్యాసంలో పేర్కొంది.

మక్కల్​ నీది మయ్యమ్​ అధినేత కమల్​ హాసన్​, సూపర్​స్టార్​ రజనీకాంత్​పై మరోమారు విమర్శలు గుప్పించింది తమిళనాడు అధికార పార్టీ అన్నాడీఎంకే. ప్రజల కోసం అవసరమైతే కలిసి నడుస్తామన్న ఇరువురు హీరోల ప్రకటనలపై వ్యంగ్యాస్త్రాలు విసిరింది. 'వేర్వేరు సిద్ధాంతాలు కలిగిన కమల్​, రజనీ కలవడం.. పిల్లి-ఎలుక ఒకే తాటిపైకి రావడంలా ఉంటుంది' అని అన్నాడీఎంకే సొంత పత్రిక 'నమదు అమ్మ' వ్యాసంలో పేర్కొంది.

" హేతువాదం, కమ్యూనిజం గురించి మాట్లాడే కమల్​.. ఆధ్యాత్మిక రాజకీయాల గురించి ప్రస్తావించే రజనీ కలవడం.. పిల్లి-ఎలుక కలిసినట్లే ఉంటుంది. రాజకీయంగా కమల్​తో స్నేహం ఫలించదని రజనీకి కాలమే చెబుతుంది. ఒకవేళ వారిద్దరూ కలిసినా 1.5 కోట్ల మంది కార్యకర్తలున్న అన్నాడీఎంకేకు ఎలాంటి నష్టం లేదు."
- 'నమదు అమ్మ' వ్యాసం

రజనీ వ్యాఖ్యలు సమంజసమే..

'పళనిస్వామి తమిళనాడు ముఖ్యమంత్రి కావడం ఓ ఆశ్చర్యం' అని సూపర్​స్టార్​ రజనీకాంత్ చేసిన వ్యాఖ్యలను మక్కల్ నీది మయ్యమ్​ వ్యవస్థాపకుడు, విశ్వనటుడు కమల్​హాసన్​ సమర్థించారు. రజనీకాంత్​ వ్యాఖ్యలు 'విమర్శ కాదు, వాస్తవికత' అని కమల్​ అభిప్రాయపడ్డారు.

ప్రజల కోసం కలిసి పనిచేస్తాం!

తమిళనాడు సంక్షేమం కోసం రజనీకాంత్​తో చేతులు కలపడానికి తాను సిద్ధమేనని, అయితే రాజకీయంగా అది వీలవుతుందో లేదో చెప్పలేమని కమల్ అన్నారు. తాము సినీ పరిశ్రమలో మాత్రం 44 ఏళ్లుగా కలిసే ఉన్నామని కమల్​ పేర్కొన్నారు.

కమల్​ వ్యాఖ్యలపై కాసేపటికే స్పందించిన రజనీ... ప్రజల కోసం అవసరమైతే తామిద్దరం కచ్చితంగా కలిసి పనిచేస్తామని స్పష్టం చేశారు.