మాస్కే బంగారమాయెనే..! ధరెంతో తెలుసా?

మాస్కు ధర లక్ష పైమాటే... అదేంటీ అంత ఖరీదు ఎందుకు అనుకుంటున్నారా? స్వచ్ఛమైన బంగారంతో చేశారు మరి. మహారాష్ట్రకు చెందిన శంకర్​ అనే వ్యక్తి 55 గ్రాముల పసిడితో చేసిన మాస్కు ధరించి అందరినీ ఆశ్చర్యపరుస్తున్నాడు.

బంగారం అంటే ఇష్టం ఉండని వారెవరూ? తమ అంతస్తును ప్రదర్శించేందుకు బంగారు ఆభరణాలను ధరిస్తుంటారు. ఇప్పటివరకు కొంతమంది బంగారు చొక్కాలు, కత్తెర వాడటమూ చూశాం. ఇంకొంత మంది కార్లకు బంగారు పూత పూయించినవారు ఉన్నారు.

కానీ, ఈ కరోనా కాలంలో అవసరంతోపాటు ట్రెండింగ్ వస్తువు మాస్క్. అదీ కూడా బంగారంతో చేయించుకున్నాడు ఓ వ్యక్తి. అవునండీ నిజమే.. మహారాష్ట్రలోని పింప్రి-చించ్​వాడ్​కు చెందిన శంకర్​ కుర్హడే.. 55 గ్రాముల స్వచ్ఛమైన పసిడితో చేసిన మాస్కును ధరిస్తున్నాడు. దీని ధర రూ.2.90 లక్షలు.

ఈ మాస్కును 8 రోజుల్లో తయారు చేశాడు స్వర్ణకారుడు. గాలి పీల్చుకునేందుకు వీలుగా చాలా సన్నగా దీన్ని తయారు చేశాడు. కొల్హాపురీ క్షౌర శాల యజమాని బంగారు కత్తెరలు ఉపయోగించటం చూసి స్ఫూర్తి పొందానని చెబుతున్నాడు శంకర్.