కేజ్రీవాల్​కు 3 ఓటరు కార్డులు: భాజపా

దిల్లీలో భాజపా, ఆమ్​ ఆద్మీ పార్టీల మధ్య ఓటరు గుర్తింపు కార్డుల గొడవ కొనసాగుతూనే ఉంది. తూర్పు దిల్లీ భాజపా అభ్యర్థి గంభీర్​కు 2 గుర్తింపు కార్డులున్నాయని స్థానిక తీస్​ హజారీ కోర్టులో ఫిర్యాదు చేసింది ఆప్​. కేజ్రీవాల్​కు 2013లోనే 3 గుర్తింపు కార్డులున్నాయని.. దీనిపై స్పందించాలని ఎదురుదాడికి దిగింది కాషాయ పార్టీ.

దిల్లీలో భాజపా, ఆప్​ల మధ్య మాటల యుద్ధం కొనసాగుతోంది. తాజాగా ఆమ్​ఆద్మీ అధినేత అరవింద్​ కేజ్రీవాల్​కు 2013లో 3 ఓటరు గుర్తింపు కార్డులుండేవని, ప్రస్తుతం ఆయన భార్యకు 3 ఓటరు ఐడీలున్నాయని ఆరోపించింది భాజపా.

అంతకుముందు తూర్పు దిల్లీ భాజపా అభ్యర్థి, భారత మాజీ క్రికెటర్​ గౌతమ్​ గంభీర్​కు 2 ఓటరు ఐడీలు ఉన్నాయని.. ఆప్​ అభ్యర్థిని అటిషి స్థానిక తీస్​ హజారీ కోర్టులో ఫిర్యాదు చేశారు. కొద్ది రోజుల్లో ఎన్నికల్లో పోటీకి అనర్హుడిగా ప్రకటించబోయే వ్యక్తికి ఓటేయడం వృథా అని​ గంభీర్​ను ఉద్దేశించి ట్వీట్​ చేశారు కేజ్రీవాల్.

ఆప్​ వ్యాఖ్యలపై ఆగ్రహించిన భాజపా.. అర్​వింద్​ కేజ్రీవాల్​కు 2013లో 3 ఓటరు గుర్తింపు ఎక్కడివని ప్రశ్నించింది.

''కేజ్రీవాల్​కు 2013 దిల్లీ అసెంబ్లీ ఎన్నికల ముందు సాహిబాబాద్​, సీమాపురి, హనుమాన్​ రోడ్​లలో ఓటరు ఐడీలున్నాయని అప్పట్లో నేను ఈసీకి ఫిర్యాదు చేశా. దీనిపై కేజ్రీవాల్​ ముందు జవాబివ్వాలి.''

- హరీశ్​ ఖురానా, భాజపా ప్రతినిధి

ప్రస్తుతం కేజ్రీవాల్​ భార్య సునీతకు దిల్లీ, యూపీ, బంగాల్​లో ఓటర్​ గుర్తింపు కార్డులున్నాయని.. వాటిని ట్విట్టర్లో షేర్​ చేశారు ఖురానా.

దీనిపై స్పందించిన ఆప్​ ప్రతినిధి సౌరభ్​ భరద్వాజ్​ 'ముఖ్యమంత్రి భార్య ప్రైవేటు వ్యక్తి. ఆమెకు ఎన్నికలతో సంబంధం లేదు. అయినప్పటికీ.. గంభీర్​ను, కేజ్రీవాల్​ను 2019 ఎన్నికల్లో అనర్హుల్ని చేద్దాం' అని భాజపాకు సవాల్​ విసిరారు.​

ఇదీ చూడండి:గౌతం గంభీర్​పై కోర్టులో ఆమ్​​ఆద్మీ ఫిర్యాదు