'కేంద్రం తప్పుదోవ పట్టించింది..' 'కాదు పిటిషనర్లే!'

రఫేల్​ తీర్పుపై సుప్రీంకోర్టును కేంద్రం తప్పుదోవ పట్టించిందని పేర్కొన్నారు పిటిషనర్లు. దీనిపై కేంద్రం మరో అఫిడవిట్​ దాఖలు చేసింది. పిటిషనర్లు దాఖలు చేసిన వ్యాజ్యం నిరాధారమైందని ఆరోపించింది. రఫేల్​ తీర్పుపై దాఖలైన రివ్యూ పిటిషన్​లను అత్యున్నత న్యాయస్థానం శుక్రవారం విచారించనుంది.

రఫేల్ యుద్ధ విమానాల కొనుగోలు​ ఒప్పందం కేసులో అనుకూల తీర్పు కోసం సుప్రీంకోర్టును కేంద్ర ప్రభుత్వం తప్పుదోవ పట్టించిందని పిటిషనర్లు ఆరోపించారు.

రఫేల్​ తీర్పు సమీక్ష కోసం పిటిషన్లు దాఖలు చేసిన మాజీ కేంద్ర మంత్రులు యశ్వంత్​ సిన్హా, అరుణ్​ శౌరి, న్యాయవాది ప్రశాంత భూషణ్​​లు గురువారం సుప్రీంకోర్టులో అఫిడవిట్​ దాఖలు చేశారు. అత్యున్నత న్యాయస్థానం డిసెంబర్​ 14న ఇచ్చిన తీర్పును పునఃపరిశీలించాలని అఫిడవిట్​లో పేర్కొన్నారు. తప్పుడు అధారాలు, అసత్య సమాచారాలను కోర్టుకు కేంద్రం సమర్పించిందని, వాటి ఆధారంగా ఉన్నత న్యాయస్థానం తీర్పునిచ్చిందని తెలిపారు.

పిటిషనర్ల అఫిడవిట్​లో నిజం లేదు

రఫేల్​ తీర్పుపై పిటిషనర్లు దాఖలు చేసిన అఫిడవిట్​ను కేంద్ర ప్రభుత్వం తిప్పికొట్టింది. పిటిషనర్లు చేసిన ఆరోపణల్లో ఏమాత్రం నిజం లేదని చెబుతూ అదనంగా మరో అఫిడవిట్​ దాఖలు చేసింది. రికార్డుల్లో ఉన్నట్టే ఆధారాలను కోర్టుకు అప్పగించామంది కేంద్రం.

రఫేల్​ విచారణలో భాగంగా కొంత మంది అధికారులు కోర్టును తప్పుదోవ పట్టించారని, వారిపై చర్యలు చేపట్టాలంటూ దాఖలైన వ్యాజ్యాన్ని కొట్టివేయాలని కేంద్రం సుప్రీంను కోరింది. ఆ ఆరోపణలు నిరాధారమని వెల్లడించింది. పలు మీడియా నివేదికలు, అసంపూర్ణ సమాచారాల ఆధారంగా వ్యాజ్యం దాఖలు చేయడం సరికాదని కేంద్రం అభిప్రాయపడింది.

రఫేల్​ తీర్పుపై దాఖలైన రివ్యూ పిటిషన్​ను శుక్రవారం ప్రధాన న్యాయమూర్తి జస్టిస్ రంజన్​ గొగొయ్​ నేతృత్వంలోని ధర్మాసనం విచారించనుంది.