ఐదుగురి ప్రాణం తీసిన ఓవర్​లోడ్​!

ఛత్తీస్​గఢ్​లో దారుణం జరిగింది. మినీ ట్రక్కు బోల్తాపడి ఐదుగురు ప్రాణాలు కోల్పోగా, మరో 25 మంది తీవ్రంగా గాయపడ్డారు. సామర్థ్యానికి మించి ప్రయాణికులను ఎక్కించుకోవడం వల్లే.. ట్రక్కు ఓవర్​లోడ్​ అయ్యి అదుపు తప్పిందని స్థానికులు తెలిపారు.

ఛత్తీస్​గఢ్​ జగ్​దల్పూర్​లో ఘోర రోడ్డు ప్రమాదం జరిగింది. కోడేనార్ పోలీస్​ స్టేషన్ పరిధిలోని రాయ్​కోట్​ గ్రామంలో మినీ ట్రక్కు బోల్తా పడింది. ఈ ఘటనలో ఐదుగురు అక్కడిక్కడే మృతి చెందగా.. మరో 25 మంది తీవ్ర గాయాలతో ఆసుపత్రిలో చికిత్స పొందుతున్నారు.

వాహన సామర్థ్యానికి మించి ప్రయాణికులను ఎక్కించుకున్న డ్రైవర్​ తప్పిదం వల్లే ప్రమాదం జరిగిందని స్థానికులు వాపోతున్నారు. రాయ్​కోట్​ నుంచి తోకాపాల్​కు బయల్దేరిన ఈ వాహనం.. ఓవర్​లోడ్​ కారణంగా రాయ్​కోట్​ సమీపంలోనే ఓ దాబా వద్ద అదుపుతప్పి బోల్తా పడింది.

ఘటనా స్థలానికి చేరుకున్న పోలీసులు.. క్షతగాత్రులను ఆసుపత్రికి తరలించారు.

ఇదీ చదవండి:'జల క్రాంతి'తో కరవు నేలలో జల సిరులు