''నమో' టీవీ ప్రసారాలను నిలిపేయండి'

ఇటీవలే ప్రారంభమైన 'నమో టీవీ'పై కేంద్ర ఎన్నికల సంఘానికి ఆమ్​ ఆద్మీ పార్టీ ఫిర్యాదు చేసింది. ఎన్నికల ప్రవర్తనా నియమావళి అమలులో ఉన్నపుడు ఒక రాజకీయ పార్టీ ఛానల్​ ప్రారంభించడం నిబంధనల అతిక్రమణ కాదా అని లేఖలో పేర్కొంది. ఈ టీవీ ప్రసారాలను నిలిపివేసేలా ఆదేశించాలని ఈసీని కోరింది మధ్యప్రదేశ్​ కాంగ్రెస్​ కమిటీ.

ప్రధాన మంత్రి నరేంద్ర మోదీ సందేశాలతో కూడిన 'నమోటీవీ' ప్రారంభంపై కేంద్ర ఎన్నికల సంఘానికి అరవింద్​ కేజ్రీవాల్​ నేతృత్వంలోని ఆమ్​ ఆద్మీ పార్టీ ఫిర్యాదు చేసింది.

ఎన్నికల కోడ్​ అమలులో ఉండగా ఒక రాజకీయ పార్టీ ప్రత్యేక ఛానల్​ను ఏర్పాటు చేయడం ప్రవర్తన నియమావళిని అతిక్రమించడం కాదా అని ఈసీని ప్రశ్నించింది.

"ఎన్నికల కోడ్​ అమలులో ఉన్నపుడు ఒక రాజకీయ పార్టీ సొంత ఛానల్​ను స్థాపించేందుకు అనుమతించవచ్చా? ఒకవేళ ఈసీ అనుమతులు లేకపోతే ఇప్పటి వరకు ఎలాంటి చర్యలు తీసుకున్నారు? ఛానల్​ను ప్రారంభించేందుకు భాజపాకు మీడియా ధ్రువీకరణ​ కమిటీ (ఎంసీసీ) ఆమోదం తెలిపిందా?
ఎంసీసీ అనుమతులు లేకుండానే ఛానల్ ప్రారంభమైతే షోకాజ్​ నోటీసులు ఎందుకు జారీ చేయలేదు? న్యాయ ప్రమాణాల ప్రకారం డబ్బు, అధికారంతో సంబంధం లేకుండా అన్ని రాజకీయ పార్టీలకు ఓటర్లను చేరుకునేందుకు సమాన అవకాశాలు ఉండాలి. ఈ ప్రధాన సూత్రాన్ని విస్మరించిన భాజపా 24 గంటల ప్రసారాలతో 'నమో టీవీ'ని ప్రారంభించింది."

-ఈసీకి లేఖలో ఆమ్​ ఆద్మీ పార్టీ

మధ్యప్రదేశ్ కాంగ్రెస్ ఫిర్యాదు

'నమో టీవీ' ప్రసారాలను తక్షణమే నిలిపివేయాలని ఎన్నికల సంఘానికి మధ్యప్రదేశ్ కాంగ్రెస్ ఫిర్యాదు చేసింది. సార్వత్రిక ఎన్నికల్లో లబ్ధి పొందేందుకే భాజపా.. ఛానల్​ను ప్రారంభించిందని మధ్యప్రదేశ్​ కాంగ్రెస్ అధికార ప్రతినిధి నీలాభ్​ శుక్లా ఆరోపించారు.

ఇదీ చూడండి:హిందువులను తీవ్రవాదులు అంటారా?: మోదీ