దిల్లీ రాజకీయ పరిణామాలు శరవేగంగా మారిపోతున్నాయి. నిన్నటి వరకు ఆప్తో పొత్తుకు ససేమిరా అంటున్న కాంగ్రెస్ కాస్త మెత్తబడింది. తాజాగా ఆప్ నేత, రాజ్యసభ ఎంపీ సంజయ్ సింగ్, దిల్లీ కాంగ్రెస్ పార్టీ ఇన్ఛార్జ్ పీసీ చాకోతో భేటీ అయ్యారు. లోక్సభ సీట్ల సర్దుబాటుపై ఇరువురు చర్చలు జరిపినట్లు తెలుస్తోంది.
జాతీయ ప్రయోజనాల దృష్ట్యా మోదీ (భాజపా) ప్రభుత్వాన్ని గద్దె దించాలని ఆప్ భావిస్తోంది. అందుకు కాంగ్రెస్తో చెలిమి చేయడానికి ముందుకొచ్చింది. దిల్లీలోని 7 లోక్సభ స్థానాల్లో కాంగ్రెస్కు 2 సీట్లు కేటాయించడానికి ఆప్ సంసిద్ధత వ్యక్తం చేసింది. కాంగ్రెస్ 3 సీట్లు కావాలని పట్టుబట్టింది. దిల్లీ, చాందినీ చౌక్, ఈశాన్య దిల్లీ స్థానాలు కావాలని తేల్చిచెప్పింది.
తాజాగా ఆప్ చేసిన ప్రతిపాదనలను చాకో.. కాంగ్రెస్ అధ్యక్షుడు రాహుల్గాంధీకి చేరవేశారు. మరికొద్ది రోజుల్లో రాహుల్ ఆప్తో పొత్తుపై ఓ నిర్ణయం ప్రకటిస్తారని ఆ పార్టీ వర్గాలు చెబుతున్నాయి.
2014 సార్వత్రిక ఎన్నికల్లో భాజపా దిల్లీలోని అన్ని (7) లోక్సభ స్థానాలను కైవసం చేసుకుంది. ఆ ఎన్నికల్లో సీట్లు రాకున్నా భాజపాతో పోల్చితే కాంగ్రెస్, ఆప్లకు కలిపి పోలైన ఓట్లు ఎక్కువ. అందువల్ల ఈ ఎన్నికల్లో భాజపాను ఓడించడానికి ఇరుపార్టీలు కూటమిగా ఏర్పడడం అనివార్యమైంది.
ప్రస్తుత సార్వత్రిక ఎన్నికల్లో భాజపా ఓటమే లక్ష్యంగా ఆప్, కాంగ్రెస్ పనిచేస్తున్నాయి. కానీ ఇప్పటి వరకు పొత్తు కుదుర్చుకోలేకపోయాయి. కాంగ్రెస్తో పొత్తుకు ఆప్ సిద్ధంగా ఉంది. షీలా దీక్షిత్ వర్గం మాత్రం ఆప్తో పొత్తును తీవ్రంగా వ్యతిరేకిస్తున్నారు. ఆప్తో పొత్తు పెట్టుకుంటే అది కాంగ్రెస్కే నష్టం చేకూరుస్తుందని చెబుతున్నారు.
