పెంపుడు శునకం కోసం యువతి బలవన్మరణం!

ఇటీవలే.. తన పెంపుడు కుక్క మరణించింది. అది చూసి తట్టుకోలేకపోయింది ఆ యువతి. తీవ్ర మనస్తాపానికి గురై.. బలవన్మరణానికి పాల్పడింది. ఈ ఘటన ఛత్తీస్​గఢ్​లో జరిగింది.

పెంపుడు శునకంపై ఉన్న అతి ప్రేమ ఓ యువతిని ప్రాణాలు తీసుకునేలా చేసింది. తన పెంపుడు శునకం మరణించిన వార్త జీర్ణించుకోలేక ఆ యువతి ఆత్మహత్యకు పాల్పడింది. ఈ ఘటన ఛత్తీస్‌గఢ్‌లోని రాయగఢ్‌ జిల్లాలో జరిగింది.

రాయ్​ఘడ్​ జిల్లాకు చెందిన ప్రియాంశు సింగ్‌(21) పీజీ చదువుతోంది. మంగళవారం రాత్రి తన పెంపుడు శునకం మరణించడంతో ఆమె తీవ్ర మనస్తాపానికి గురైంది. శునకాన్ని ఖననం చేసిన ఆ తర్వాతి రోజు ఉదయాన్నే ఆమె ఉరి వేసుకుని ఆత్మహత్య చేసుకుందని కోట్ర పోలీస్‌స్టేషన్‌ అధికారి చమన్‌ సిన్హా తెలిపారు.

లేఖ రాసి..

ఆందోళనతో కుటుంబసభ్యులు ఆమె గదిలోకి వెళ్లి పరిశీలించగా ఓ లేఖ దొరికింది. అందులో ఆమె తనను తన శునకంతో పాటే ఖననం చేయాలని పేర్కొన్నట్లు కుటుంబసభ్యులు తెలిపారు. కాగా ఘటనపై కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు.

ఇదీ చూడండి:రూ. 35 కోట్ల విలువైన బంగారం పట్టివేత