మంత్రి తనయుడి కారు ఆపడమే ఆ పోలీస్​ తప్పా?

విధి నిర్వహణలో భాగంగా..​ మంత్రి కుమారుడి కారును ఆపినందుకు ఏకంగా తన ఉద్యోగానికే రాజీనామా చేశారు ఓ పోలీస్​ కానిస్టేబుల్. కర్ఫ్యూ నిబంధనల్ని లెక్కచేయకుండా, కనీసం మాస్కైనా లేకుండా బయటకు వచ్చిన అతడ్ని ప్రశ్నించినందుకే ఆమెకు ఈ పరిస్థితి తలెత్తింది.

రాత్రి కర్ఫ్యూ సమయంలో తిరుగుతున్న మంత్రి తనయుడి కారును ఆపిన ఓ మహిళా కానిస్టేబుల్ రాజీనామా చేసిన దుస్థితి గుజరాత్​లో నెలకొంది.

ఏం జరిగిందంటే.?

గుజరాత్ ఆరోగ్య మంత్రి కుమార్​ కనానీ కుమారుడు ప్రకాశ్​.. అర్ధరాత్రి స్నేహితులతో కలిసి సూరత్​లో కారులో బయల్దేరాడు. మాస్క్​ ధరించకుండా కర్ఫ్యూ నిబంధనలు ఉల్లంఘించినందుకుగానూ మహిళా కానిస్టేబుల్​ సునీతా యాదవ్​ ఆ కారును ఆపారు. అదే ఆమె చేసిన పాపమయింది. ఆగ్రహించిన మంత్రి కుమారుడు ఆమెతో వాగ్వాదానికి దిగి బెదిరింపులకు పాల్పడ్డాడు. విషయం తెలిసిన ఉన్నతాధికారులు ఆమెకు మద్దతు ఇవ్వకపోగా.. అక్కడి నుంచి వెళ్లిపోవాలని సూచించారు.

అయినా మద్దతులేరాయే..

గత బుధవారం జరిగిన ఈ ఘటనను పూర్తిగా కప్పిపుచ్చే ప్రయత్నం చేశారు అధికారులు. మంత్రి కుమారుడు బెదిరించినా.. పోలీసు ఉన్నతాధికారులెవరూ తనకు మద్దతుగా నిలవకపోవడం వల్ల సునీతా యాదవ్​ తన ఉద్యోగానికి రాజీనామా చేశారు. అయితే ప్రకాశ్​, ఆమెతో వాగ్వాదానికి దిగిన వీడియో ఇప్పుడు సామాజిక మాధ్యమాల్లో వైరల్​గా మారింది.

ఇదీ చదవండి:'జీవితాలను సరిదిద్దుకొనే సమయమిదే'