దివ్యాంగుల రెస్టారెంటులో స్ఫూర్తి, స్థైర్యమే స్పెషల్​ డిష్​లు!

పగవారికి కూడా రాకూడదని భావించే అంగవైకల్యంతో కలిగే బాధలు వర్ణనాతీతం. సమాజంలోనూ ఇలాంటి వారిపై చిన్నచూపే. అయితే... ఒడిశాలోని ఓ రెస్టారెంటు వీరిని ప్రత్యేకంగా నిలిపింది. ఆ భోజనశాలలో పనిచేసేవారంతా ఏదో ఒక శారీరక వైకల్యంతో బాధపడుతున్నవారే కావడం విశేషం.

నిత్యజీవితంలో ఎదుర్కొంటున్న అనేకానేక సమస్యలను దివ్యాంగులు ఇతరులతో చెప్పుకోలేరు. ఇంకొకరి ఆసరా కూడా వారికి పెద్ద భారమే. అలా బాధపడేవారికి ఒడిశాలోని ఓ రెస్టారెంటు ఆదర్శంగా నిలుస్తోంది. కారణం... అందులో పనిచేసేవారంతా ఏదో ఒక అంగవైకల్యంతో బాధపడుతున్నవారే.

గొప్ప సంకల్పం....

ఒడిశాలోని ఈ దివ్యాంగుల బృందం.. సమాజానికి ఏదో చెప్పాలనుకుంది. వారిని విస్మరించరాదని, చిన్నచూపు చూడకూడదని చెబుతూ.. బాధ్యతాయుతంగా నిలిచింది. అందుకే భువనేశ్వర్​లో పూర్తిగా వీరి ఆధ్వర్యంలోనే 'తృప్తి కెఫే' అనే హోటల్​ నడుస్తోంది. క్రమక్రమంగా ఎదుగుతోన్న ఈ నగరంలో మనుషులకు బదులు రోబోలూ హోటళ్లలో సేవలందిస్తున్నాయి. ఇలాంటి సమయంలో.. పెద్ద పెద్ద షెఫ్​లకు ఏ మాత్రం తీసిపోకుండా ఈ చిన్నపాటి రెస్టారెంట్​ను నడిపిస్తున్నారంటే వారి సంకల్పం ఎంత గొప్పదో అర్థం చేసుకోవచ్చు.

హోటల్​కు వచ్చే వారికి ఆహారం వండి.. వడ్డించడమే కాకుండా ఇతరత్రా అన్ని పనులనూ వారే చేసుకుంటుంటారు. బిస్కెట్లు, కేక్​లు, ఇతర తినుబండారాలను సక్రమంగా అమర్చుతారు. నిర్వహణా వారే చూసుకుంటారు.

స్వయం ఉపాధి కోసం ప్రయత్నిస్తున్న సమయంలో ఈ దివ్యాంగుల బృందానికి భువనేశ్వర్​లోని 'ఓపెన్​ లెర్నింగ్​ సిస్టమ్​' సంస్థ చేయూతనందించింది. డబ్బు సంపాదించేందుకు మార్గం చూపించింది. 'తృప్తి కెఫే'ను స్థాపించేందుకు సాయం చేసింది.

తమకు తాముగా ఏమీ సాధించలేమని నిరాశకు గురయ్యే ఎందరో దివ్యాంగుల్లో నూతనోత్తేజం, మానసిక స్థైర్యం నింపడమే వీరి ప్రయత్నం వెనుక ఉద్దేశం.