ట్రంప్​ కోసం 'పోలీస్​ అమ్మ' డ్యూటీ- పసి బిడ్డతో కలిసి...

'తల్లిని మించిన యోధుడు ఎవరూ లేరు' అని ఓ కవి చెప్పిన మాట అక్షరాల నిజమేనని మరోసారి నిరూపించింది గుజరాత్​లోని ఓ పోలీస్​ అమ్మ. ఏడాది వయసున్న తన కుమారుడికి రోడ్డు పక్కనే ఊయల కట్టి.. అమ్మగా బాధ్యత నిర్వర్తిస్తూనే.. కానిస్టేబుల్​గా తన కర్తవ్యాన్ని నిర్వహిస్తోంది.

"కొంచెం కష్టంగా ఉంటుంది. కానీ, ఓ వైపు అమ్మగా బాధ్యత తీసుకోవాలి, డ్యూటీ కూడా చేయాలి. మా వాళ్లంతా 24 కిలోమీటర్ల దూరంలో ఉంటారు. ఒక రోజు వాళ్ల దగ్గర బాబును ఉంచాను. ఆ రోజంతా తను బాగా ఏడ్చాడు. ఏడాది వయసున్న నా కుమారుడికి ఒంట్లో బాలేదు. బయట తిండి తినలేడు, నా చనుబాలతోనే తన ఆకలి తీర్చుకుంటాడు. అందుకే నేను నా బాబును వెంటబెట్టుకునే ఉద్యోగం చేస్తున్నాను. " అంటూ.. అటు అమ్మగా, ఇటు కానిస్టేబుల్​గా ఒకేసారి బాధ్యతలు నిర్వర్తిస్తోంది సంగీత బెనర్జీ.

గుజరాత్​ బరోడాలోని కోర్వా పోలీస్​ స్టేషన్​లో కానిస్టేబుల్​గా ఉద్యోగం చేస్తున్న సంగీత.. అమెరికా అధ్యక్షుడు డొనాల్డ్ ట్రంప్​ పర్యటన నేపథ్యంలో ​అహ్మదాబాద్​లో బందోబస్తు విధులకు హాజరైంది.

ఓ చెట్టుకు చీరతో ఊయల కట్టి.. అందులో తనయున్ని పడుకోబెట్టి.. ఆ సమయంలో విధులు నిర్వహిస్తున్న ఈ 'పోలీస్​ అమ్మ'ను చూసి అందరి హృదయాలను చెలించాయి. దగ్గు, జలుబుతో బాధపడుతున్న తన కుమారుడిని ఒంటరిగా ఇంట్లో వదిలిరాలేక.. ఇటు వృత్తి బాధ్యతను విస్మరించలేక ఈ ఉపాయం చేసింది సంగీత.

ఇదీ చదవండి:దిల్లీ బడిలో మెలానియాకు 'సంతోషాల పాఠాలు'