కర్ణాటకలో ఓ చిన్నపాటి అద్భుతమే జరిగింది. తాటి చెట్టుపై స్పృహ తప్పిన కల్లు గీత కార్మికుడు రెండు గంటల పాటు కింద పడలేదు. పైగా ఏ ఆసుపత్రికి తీసుకెళ్లకుండా తనంతట తానే లేచి కూర్చున్నాడు.
ఉడుపి జిల్లా, కల్లోలికి చెందిన సంతోష్.. 20 ఏళ్లుగా కల్లు గీత పని చేస్తున్నాడు. రోజూలాగే ఉదయం 6.30 గంటలకు తాటి చెట్టెక్కాడు. తీరా చెట్టు పైకి చేరుకున్నాక సొమ్మసిల్లిపోయాడు. దాదాపు రెండు గంటల పాటు చెట్టు మీదే స్పృహ లేకుండా, కదలకుండా ఉండిపోయాడు.
8.30 గంటలకు గ్రామస్థులు అటువైపు వెళ్లారు కానీ, స్పృహతప్పిన సంతోష్ను గమనించలేదు. ఆ తర్వాత ఓ అరగంటకు గ్రామంలోని ఓ హోటల్ యజమాని సుధాకర్ శాల్యన్ కల్లు కోసం అటువైపు వచ్చాడు. సంతోష్ చెట్టుపై ఉలుకూపలుకు లేకుండా ఉండడాన్ని గమనించాడు. వెంటనే అగ్నిమాపక సిబ్బందికి సమాచారమిచ్చాడు.
అగ్నిమాపక సిబ్బంది రంగంలోకి దిగి ఆపస్మారక స్థితిలో ఉన్న సంతోష్కు తాళ్లు కట్టి, కిందకు దించారు. సుధాకర్ కారులో ఆసుపత్రికి తరలిస్తుండగా.. సంతోష్ లేచి కూర్చున్నాడు. తనకేమీ అవ్వనట్టుగా సాధారణంగా మాట్లాడడం మొదలెట్టాడు. అసలు తాటి చెట్టు ఎక్కడమే మహా కష్టం అలాంటిది.. స్పృహ లేకుండా దానిపై రెండు గంటలు కింద పడకుండా ఉండడం నిజంగా ఓ అద్భుతమే అంటున్నారు గ్రామస్థులు.
ఇదీ చదవండి: కర్రల వంతెనతో ప్రకృతికే కొత్త కళ