అప్పు కోసం బ్యాంక్​లో తుపాకీతో వీరంగం

ఓ వ్యక్తి తుపాకీతో బ్యాంకులోకి ప్రవేశించి కలకలం సృష్టించిన ఘటన తమిళనాడు కోయంబత్తూరులో జరిగింది. ఎంత ప్రయత్నించినా రుణం మంజూరుకాకపోవడంవల్లనే ఈ చర్యకు పాల్పడినట్లు తెలుస్తోంది. నిందితుడి దాడిలో మధ్యవర్తి సహా బ్యాంకు మేనేజర్​కు స్వల్పంగా గాయాలయ్యాయి.

బ్యాంకురుణం మంజూరుకాలేదనే ఆగ్రహంతో ఓ వ్యక్తి... మధ్యవర్తి సహా బ్యాంకు అధికారులపై దాడిచేసిన ఘటన తమిళనాడు కోయంబత్తూరులో జరిగింది.

వెట్రివేలన్​ కోయంబత్తూరు కెనరాబ్యాంకు నుంచి రూ.3 లక్షల రుణం కోసం ప్రయత్నించినట్లు తెలుస్తోంది. ఇందుకు మధ్యవర్తిగా గుణబాలన్ అనే వ్యక్తి ఉన్నట్లు సమాచారం. అయితే ఎంతకాలమైనా రుణం మంజూరుకానందున వెట్రివేలన్​ ఆగ్రహంతో ఊగిపోయాడు. రహస్యంగా ఓ తుపాకీ తీసుకొని బ్యాంకులోకి ప్రవేశించాడు.

బ్యాంకు అధికారులపైనా..

బ్యాంక్​ మేనేజర్​ గదిలోనే మధ్యవర్తి గుణబాలన్​కు తుపాకీ గురిపెట్టి దాడిచేశాడు వెట్రివేలన్. కొద్ది క్షణాలకు తేరుకున్న బ్యాంకు మేనేజర్​ చంద్రశేఖర్​ వారిని ఆపి, తుపాకీ​ తీసుకునేందుకు ప్రయత్నించారు. అయితే వెట్రివేలన్ ఆయనపైనా దాడిచేశాడు. ఆపేందుకు యత్నించిన సిబ్బందిపైనా విరుచుకుపడ్డాడు. కాసేపటికి వెట్రివేలన్​ను అదుపులోకి తీసుకుని పోలీసులకు అప్పగించారు. ఈ దృశ్యాలు అక్కడే ఉన్న సీసీటీవీ కెమెరాల్లో రికార్డయ్యాయి. వెట్రివేలన్ తెచ్చింది బొమ్మ తుపాకీ అని అనుమానం.

ఇదీ చూడండి: మంచు కొండలు విరిగిపడి ఐదుగురు జవాన్లు మృతి