భాజపా చొక్కా వేసుకుని రైతు ఆత్మహత్య..!

మహారాష్ట్ర ముఖ్యమంత్రి దేవేంద్ర ఫడణవీస్​ ఎన్నికల ప్రచారంలో ఓ విషాద ఘటన చోటు చేసుకుంది. అప్పుల బాధ భరించలేక ఓ రైతు ఉరి వేసుకుని ఆత్మహత్యకు పాల్పడ్డాడు. రాష్ట్ర ప్రభుత్వం రైతు ఆత్మహత్యలను పట్టించుకోవాలనే ఉద్దేశంతో భాజపా గుర్తు ఉన్న చొక్కా ధరించి ఆత్మహత్యకు పాల్పడినట్లు గ్రామస్థులు తెలిపారు.

మహారాష్ట్ర అసెంబ్లీ ఎన్నికల సమయం దగ్గర పడుతున్న తరుణంలో ఎన్నికల ప్రచారాలు ముమ్మరం చేశాయి పార్టీలు. ఈ క్రమంలోనే నేడు బుల్దానా జిల్లాలోని నందుర్​, ఖామ్​గావూన్​, సంగ్రమ్​ పాల్​ తాలుకాల్లో ప్రచారం చేపట్టారు ఆ రాష్ట్ర ముఖ్యమంత్రి దేవేంద్ర ఫడణవీస్​. ఇదే సమయంలో జిల్లాలోని శేగావూన్​ తాలూకాలో విషాద ఘటన చోటుచేసుకుంది. ఓ రైతు భాజపా గుర్తు ఉన్న చొక్కా వేసుకుని ఆత్మహత్యకు పాల్పడ్డాడు.

కార్మిక శాఖ మంత్రి డా.సంజయ్​ కుట్టే నియోజకవర్గం జల్గావూన్​లోని ఖాత్​ఖేడ్​ గ్రామంలో ఉదయం 11.30 గంటల ప్రాంతంలో ఈ ఘటన చోటుచేసుకుంది. మృతి చెందిన రైతు రాజు గ్యానదేవ్​ తల్వార్​ (35)గా గుర్తించారు.

అప్పులతోనే...

రూ. 2 లక్షల వరకు అప్పులు ఉండటం వల్ల గత కొంత కాలంగా గ్యానదేవ్​ ఒత్తిడికి లోనయ్యాడని గ్రామస్థులు తెలిపారు. అయినప్పటికీ ఎన్నికల ప్రచారంలో చురుగ్గా పాల్గొన్నట్లు తెలిపారు. రాష్ట్రంలో రైతుల ఆత్మహత్యలను ప్రభుత్వం పట్టించుకునేందుకు భాజపా చొక్కా వేసుకుని ఆత్మహత్యకు పాల్పడినట్లు గ్రామస్థులు చర్చించుకుంటున్నారు. ఘటనాస్థలానికి చేరుకున్న పోలీసులు కేసు నమోదు చేసుకుని దర్యాప్తు చేపట్టారు.

ఇదీ చూడండి: ఆర్టికల్ 370పై విపక్షాలకు మోదీ సవాల్​