కన్నుల పండుగగా 'గోమాత సీమంతం'

కర్ణాటకలో ఓ వ్యక్తి తన ఇంటిలోని గోమాతకు ఘనంగా సీమంతం చేశాడు. ఊరి వారందరిని పిలిచి కనుల పండువగా వేడుక నిర్వహించాడు.

ప్రకృతిలోని ప్రతి జీవితోనూ మానవునికి అనుబంధం ఉంటుంది. అందులో పశువులతో పెను వేసుకున్న బంధం ప్రత్యేకం. ఆవును తమ కుటుంబ సభ్యుల్లో ఒకరిగా భావించిన ఓ కుటుంబం.. దానికి ఘనంగా సీమంతం చేసింది. కర్ణాటకలోని బెళగావిలో జరిగిన ఈ వేడుక.. ఆ ఊళ్లో పండుగ వాతావరణాన్ని తలపించింది.

చిక్కోడి తాలుకాలోని యక్షాంబ గ్రామానికి చెందిన తుకారమ మాలి.. గతంలో కష్టాలతో సమతమతవుతున్న క్రమంలో ఓ ఆవును తెచ్చుకుని పెంచుకోమని కొందరు సలహా ఇచ్చారు. అప్పటినుంచి ఆయన గోమాతను పెంచుకుంటున్నారు. అనంతరం తన కష్టాలు తొలిగిపోయి.. ఆర్థిక పరిస్థితీ మెరుగైందని తెలిపారు మాలి. ఆ ఆవుకు 'గౌరి' అనే పేరు పెట్టి సొంత కూతురిగా భావించి.. ఎంతో ఆప్యాయంగా దాని బాగోగులు చూసుకుంటున్నారు. ఇటీవల అది గర్భం దాల్చి ఐదు నెలలైన సందర్భంగా ఘనంగా సీమంతం నిర్వహించారు. రంగు రంగుల చీరలు, పూలు వేసి అందంగా అలంకరించారు.

ఈ కార్యక్రమానికి ఆ ఊరి ప్రజలు పెద్దఎత్తున హాజరై అంగరంగ వైభవంగా వేడుకను జరిపించారు. అతిథులకు రుచికరమైన విందు భోజనం ఏర్పాటు చేశాడు మాలి.

ఇదీ చదవండి:కేరళ తీరంలో తగ్గిన 'ఆలివ్​ రిడ్లీ' తాబేలు గూళ్లు!